თბილისში, ისნის რაიონში ნავთლუღის ქუჩა N 6-ში პარტია „თავისუფალი დემოკრატების“ თბილისის ორგანიზაციის პირველი რაიონული ოფისი გაიხსნა.
ოფისის გახსნას ‘’თავისუფალი დემოკრატების’’ ლიდერები ალექსი პეტრიაშვილი, ზურაბ აბაშიძე, დავით ონოფრიშვილი და გიორგი ცაგარეიშვილი დაესწრნენ. ოფისი ისნის რაიონის მოსახლეობის მისაღებად ყოველდღიურ რეჟიმში იმუშავებს. პარტია „თავისუფალი დემოკრატები“ ოფისების გახსნას ზაფხულის ბოლომდე დედაქალაქის ათივე რაიონში გეგმავს.
„ჩვენ ვემზადებით არჩევნებისთვის და შესაბამისად, ვემზადებით მხოლოდ და მხოლოდ გამარჯვებისთვის, მაგრამ ამისთვის საჭიროა სერიოზული მუშაობა ჩვენს მოქალაქეებთან და მოსახლეობასთან. ეს ოფისი იქნება მუდმივად ღია სამუშაო და არასამუშაო საათებშიც, იმისთვის, რომ კარგად გავიგოთ ისნის რაიონის მოსახლეობის პრობლემები. თბილისის მთავრობა და საქართველოს ხელისუფლება მოსახლეობას პრობლემებს ვერ უგვარებს. ამიტომ, მნიშვნელოვანია, რომ ჩვენი პოლიტიკური ძალა ახლოს იყოს ჩვენს მოქალაქეებთან. ჩვენ ვიქნებით სრულ საბრძოლო ფორმაში უახლოეს მომავალში“, - განაცხადა ალექსი პეტრიაშვილმა.
