მიმდინარე კვირას კანონმდებლები „მაღალმთიანი რეგიონების განვითარების შესახებ“ კანონპროექტთა პაკეტს განიხილავენ. როგორც პარლამენტის თავმჯდომარემ დავით უსუფაშვილმა ბიუროს სხდომაზე განაცხადა, კონსტიტუცია ითვალისწინებს, რომ მაღალმთიანი რეგიონების განვითარებისთვის სახელმწიფო შეღავათებს ადგენდეს.
„ეს არის კონსტიტუციური ვალდებულების შესრულება. საქართველოს კონსტიტუცია ითვალისწინებს, რომ მაღალმთიანი რეგიონების განვითარებისთვის სახელმწიფო ადგენს შეღავათებს“, - განმარტა კანონპროექტთან დაკავშირებით დავით უსუფაშვილმა.
შეგახსენებთ, რომ „მაღალმთიანი რეგიონების განვითარების შესახებ“ კანონპროექტის პაკეტი მაღალმთიანი რეგიონების სოციალურ-ეკონომიკური განვითარების, მათთვის გარკვეული შეღავათების დაწესებისა და მაღალმთიან რეგიონებში მცხოვრები პირების სოციალურ-ეკონომიკური მდგომარეობის გაუმჯობესებასთან დაკავშირებულ საკითხებს არეგულირებს.
რიგგარეშე სესიაზე, კანონმდებლები ასევე განიხილავენ „საქართველოს 2014 წლის სახელმწიფო ბიუჯეტის შესრულების წლიური ანგარიშს“; სახელმწიფო აუდიტის სამსახურის 2014 წლის სახელმწიფო ბიუჯეტის შესრულების წლიური ანგარიშის შესახებ მოხსენებას; საქართველოს ეროვნული ბანკის 2014 წლის წლიურ ანგარიშს; „საზოგადოებრივი მაუწყებლის“ 2014 წლის საქმიანობის ანგარიშს და 2014 წელს საქართველოში ადამიანის უფლებათა და თავისუფლებათა დაცვის მდგომარეობის შესახებ“ საქართველოს სახალხო დამცველის ანგარიშს მოისმენენ.
დეპუტატები ასევე, განიხილავენ საქართველოს პარლამენტის დადგენილების პროექტს „საქართველოსა და ევროპის რეკონსტრუქციის და განვითარების საერთაშორისო ბანკს შორის (ქვემო ქართლის მყარი ნარჩენების პროექტი)“ სასესხო ხელშეკრულების რატიფიცირების შესახებ“.
მიმდინარე კვირას კანონმდებლები „საქართველოს 2015 წლის სახელმწიფო ბიუჯეტის შესახებ“ საქართველოს კანონში ცვლილების შეტანის თაობაზე იმსჯელებენ.
1-ელ ივლისს, პარლამენტის რიგგარეშე სესიის პლენარული სხდომა 13.00 საათზე, ბიუროს სხდომა კი, 12.00 საათზე გაიმართება.
