საქართველოს პრეზიდენტი გიორგი მარგველაშვილი ბულგარეთის პრეზიდენტს როსენ პლევნელიევს ჯერ პირისპირ და შემდეგ გაფართოებულ ფორმატში შეხვდა.
შეხვედრისას მხარეებმა საქართველოში მომხდარი სტიქიის შედეგები განიხილეს. ბულგარეთის პრეზიდენტმა ქართველ კოლეგას საქართველოში დატრიალებული ტრაგედიის გამო მიუსამძიმრა და დახმარება აღუთქვა.
შეხვედრისას მხარეებმა ორ ქვეყანას შორის არსებული ურთიერთობა განიხილეს. ხაზგასმით აღინიშნა საქართველოს, როგორც ევროპის კარიბჭის მნიშვნელობა. გიორგი მარგველაშვილმა ბულგარელ კოლეგას მადლობა გადაუხადა საქართველოს სუვერენიტეტისა და ტერიტორიული მთლიანობის, ასევე ევროპულ და ევროატლანტიკურ სტრუქტურებში ინტეგრაციის ურყევი მხარდაჭერისთვის. თავის მხრივ, როსენ პლევნელიევმა საქართველოს პრეზიდენტს ინტეგრაციისა, და რიგისა და უელსის სამიტის გადაწყვეტილებათა იმპლემენტაციის პროცესში დახმარება აღუთქვა.
მხარეებმა შავი ზღვის აუზის რეგიონის უსაფრთხოების საკითხებიც განიხილეს, მათ შორის საუბარი შეეხო საქართველოს ოკუპირებული ტერიტორიების პრობლემატიკასა და საქართველო-რუსეთის ურთიერთობას. საუბრისას ხაზი ასევე გაესვა ორ ქვეყანას შორის ეკონომიკის, ენერგეტიკისა და ტრანსპორტის სფეროებში თანამშრომლობის გაღრმავების პერსპექტივებს.
