საქართველოში ვიზიტის ფარგლებში ბულგარეთის პრეზიდენტი როსენ პლევნელიევი 13-14 ივნისის თბილისში მომხდარ სტიქიის ადგილსაც მოინახულებს და დაღუპულების ხსოვნას პატივს მიაგებს.
ოფიციალური ვიზიტით ბულგარეთის რესპუბლიკის პრეზიდენტი საქართველოს დღეს ეწვევა.ბულგარელ კოლეგას საქართველოს პრეზიდენტი გიორგი მარგველაშვილი უმასპინძლებს.
საქართველოს პრეზიდენტის სასახლეში პრეზიდენტების პირისპირ და გაფართოებულ ფორმატში შეხვედრები გაიმართება.
პირველი პირები მედიისთვის პრესკონფერენციასაც გამართავენ.
ბულგარეთის პრეზიდენტი გმირთა მოედანზე საქართველოს ერთიანობისათვის დაღუპულ გმირთა მემორიალს გვირგვინით შეამკობს. ვიზიტის ფარგლებში ბულგარეთის პრეზიდენტი სრულიად საქართველოს კათოლიკოს პატრიარქს ილია მეორეს, პარლამენტის თავმჯდომარეს დავით უსუფაშვილს, საქართველოს პრემიერ-მინისტრს ირაკლი ღარიბაშვილსა და აჭარის ავტონომიური რესპუბლიკის მთავრობის თავმჯდომარეს არჩილ ხაბაძეს შეხვდება.
ბულგარეთის პრეზიდენტის ორდღიანი ვიზიტი, ხვალ აჭარაში დასრულდება.
როსენ პლევნელიევი ბათუმში, საერთაშორისო კონფერენციაში „საქართველოს ევროპული გზა“ მიიღებს მონაწილეობას.
