თბილისის მუნიციპალიტეტის საკრებულოს თავმჯდომარემ გიორგი ალიბეგაშვილმა თბილისში მომხდარი სტიქიის გამო მწუხარება გამოთქვა და საკრებულოს სახელით დაღუპულთა ოჯახებს მიუსამძიმრა.
,,დედაქალაქის საკრებულოს სახელით ღრმა მწუხარებას გამოვთქვამ მომხდარის გამო და სტიქიის შედეგად დაღუპულთა და დაზარალებულთა ოჯახებს სამძიმარს ვუცხადებ. სამთავრობო კომისიის, დედაქალაქის მერიის, საკრებულოსა და სხვა შესაბამისი უწყებების ხელშეწყობით სამაშველო სამუშაოები უწყვეტ რეჟიმში მიმდინარეობს, ყველა კრიტიკულ უბანზე გაწმენდითი სამუშაობი ტარდება და პარალელურად ზარალის დათვლა ხორციელდება.
ვცდილობთ, მაქსიმალურად მოკლე ვადაში უზრუნველვყოთ იმ ოჯახების პრობლემების მოგვარება, რომლებიც მძიმე მდგომარეობაში ჩაცვივდნენ.
ჩემი და ჩემი თანაგუნდელების სახელით, კიდევ ერთხელ გამოვთქვამ ღრმა მწუხარებას წუხელ ქალაქ თბილისში დატრიალებული უდიდესი ტრაგედიის გამო, რომელსაც არაერთი ადამიანის სიცოცხლე ემსხვერპლა’’,-განაცხადა გიორგი ალიბეგაშვილმა.
საკრებულოს თავმჯდომარემ ხაზი გაუსვა იმ გარემოებასაც, რომ სტიქიით მიყენებული ზიანის აღმოსაფხვრელად სამუშაო პროცესში დიდი რაოდენობის ახალგაზრდობა ჩაერთო.
,,ამგვარი სოლიდარობა დიდი ხანია ჩვენს მოსახლეობას არ გამოუხატავს.
ამასთანავე, დახმარების სურვილი გამოთქვეს როგორც სხვადასხვა ქალაქების საკრებულოებმა, ასევე მეგობარი ქვეყნების მთავრობებმა.
მსურს, ყველას დიდი მადლობა გადავუხადო, თუმცა, ვფიქრობ, რომ ურთიერთთანადგომით ამ გამოწვევას ღირსეულად გავუმკლავდებით’’,-აღნიშნა გიორგი ალიბეგაშვილმა.
