საბანკო სექტორში კრედიტების გაცემის მოცულობა გაიზრდება, ხოლო საპროცენტო განაკვეთები შედარებით შემცირდება. ამის შესახებ განცხადება პარლამენტის თავმჯდომარემ დავით ბაქრაძემ დღეს პარალმენტში საბანკო სექტორის წარმომადგენლებთან გამართული შეხვედრის შემდეგ გააკეთა.
როგორც ბაქრაძემ აღნიშნა, საბანკო სექტორის წარმომადგენლებს შეხვდა იმ მიზნით, რათა გაირკვეს საბანკო სექტორს პარლამენტის მხრიდან მუშაობის გამარტივებისათვის რა დახმარებები სჭირდება და როგორც ბაქრაძე აცხადებს, პარლამენტის მიერ უკვე მიღებული ცვლილება, რომელიც საგადასახადო კოდექსში შევიდა და ითვალისწინებს იპოთეკით დატვირთული ქონების რეალიზაციის ახლებურად დარეგულირებას მიმართულია სამართლიანობის პრინციპისკენ და ხელს უწყობს ბანკების საქმიანობის სტიმულირებას.
შეგახსენებთ, რომ აღნიშნული ცვლილების თანახმად იპოთეკით დატვირთული ქონების რეალიზაციისას აქამდე არსებული კანონმდებლობით პრივილეგია ენიჭებოდა საგადასახადოს, ცვლილების შედეგად კი პრივილეგირებულ მდგომარეობაში იქნება ის, ვინც პირველმა დაარეგისტრირა ქონება იპოთეკით.
დავით ბაქრაძის განცხადებით, აღნიშნულ ცვლილებას ბანკის წარმომადგენლები დადებითად აფასებენ და აღნიშნავენ, რომ მათ საქმიანობას აღნიშნული პრინციპის განხორციელება უკვე დაეტყო კიდეც. სწორედ ამიტომ, პარლამენტის თავმჯდომარე აცხადებს, რომ ხელისუფლება აღნიშნულ კურსს გააგრძელებს და ქვეყანაში ეკონომიკის გაუმჯობესებისათვის და მოსახლეობისთვის უკეთესი პირობების შექმნისათვის ბანკებთან მიმართებაში სახელმწიფო საჭიროებისამებრ სხვა ცვლილებებსაც გაატარებს.
