ევროსაბჭოს საპარლამენტო ასამბლეის საგაზაფხულო სესიაზე სიტყვით
უკრაინის პრეზიდენტი ვიქტორ იანუკოვიჩი და რუსეთის საგარეო საქმეთა მინისტრი სერგეი ლავროვი გამოვლენ.
როგორც "ჯი-ეიჩ-ენს" საქართველოში ევროპის საბჭოს საინფორმაციო ბიუროდან აცნობეს, ლავროვის გამოსვლა 29 აპრილსაა ჩანიშნული, იანუკოვიჩის მიმართვის ზუსტი თარიღი კი დაზუსტების პროცესშია.
აღნიშნული ბიუროს ინფორმაციითვე, სესიის დღის წესრიგით გათვალისწინებულია ეკონომიკური კრიზისის შედეგების თემაზე დებატების გამართვაც.
გარდა ამისა, პარლამენტარები იმსჯელებენ საქართველოსა და რუსეთს შორის ომის შედეგების შესახებ, რაშიც აღნიშნული კონფლიქტის გარშემო ფაქტების მომკვლევი საერთაშორისო მისიის ყოფილი ხელმძღვანელი ჰაიდი ტალიავინიც მიიღებს მონაწილეობას.
დღის წესრიგით გათვალისწინებულ სხვა თემებს შორისაა ასევე საზღვაო მეკობრეობასთან ბრძოლა, ყოფილ საბჭოთა კავშირში დიდი შიმშილობის (ჰოლოდომორი) მსხვერპლთათვის პატივის მიგება, მოწმეთა დაცვა და ლობირების სფეროში ევროპული ქცევის კოდექსის შემუშავება.
გარდა ამისა, ევროპის საბჭოს ადამიანის უფლებათა კომისარი თომას ჰამარბერგი 2009 წლის საქმიანობის წლიურ ანგარიშსაც წარმოადგენს.
