თბილისის ყველა ბაგა-ბაღი შესაძლოა სწავლების ახალ მეთოდზე გადავიდეს. ეს არის იტალიის საბავშვო ბაღებში აპრობირებული სწავლება, რომელსაც ”რეჯიო-ემილიას მეთოდს” უწოდებენ.
”რეჯიო-ემილიას მეთოდოლოგიაში” ერთ-ერთი მნიშვნელოვანია სააღმზრდელო ჯგუფების ინტერიერი, რომელიც რეკომენდირებულია ჯანსაღი ფსიქიკის განვითარებისთვის. რეჯიოს ოთახების მოწყობილობა მთლიანად ბუნებრივი მასალისაა. ნატურალურ ფერებშია კედლები და სხვა საჭირო ნივთები. ასევე, საგნები, რომლებსაც ბავშვები სათამაშოდ და სხვადასხვა ნივთების შესაქმნელად იყენებენ.
თბილისის მე-6 ბაგა-ბაღში სწავლების ახალი მეთოდოლოგიის პილოტიორება უკვე დაიწყო. მე-6 ბაღის დირექტორის ინოვაციურ მიდგომას ხვალ სხვა ბაღების წარმომადგენლები გაეცნობიან.
ღონისძიება საქართველოს პედაგოგთა და მეცნიერთა თავისუფალი პროფკავშირის ინიციატივით ეწყობა. შეხვედრას დიდუბე-ჩუღურეთის მაჟორიტარი დეპუტატები და საკრებულოს წევრებიც დაესწრებიან.
დისკუსია-დებატები ხვალ, 12 ივნისს 17:00 საათზე ეროვნული ბიბლიოთეკის მესამე კორპუსის საკონფერენციო დარბაზში გაიმართება.
