"ალიანსი საქართველოსთვის" თანათავმჯდომარე დავით გამყრელიძე "ნაციონალური მოძრაობის" საარჩევნო სლოგანს იწონებს, თუმცა გუნდს, რომლითაც მმართველი ძალა არჩევნებში აპირებს მონაწილეობას, იწუნებს.
"იმედი მაქვს საზოგადოება ჯეროვან დასკვნას გააკეთებს იქედან გამომდინარე, თუ რა გუნდით აპირებს მმართველი ძალა არჩევნებში მონაწილეობას", - განუცხადა დღეს გამყრელიძემ ჟურნალისტებს "ნაციონალური მოძრაობის" მიერ ცესკოში თბილისის მერობის კანდიდატისა და საარჩევნო სიის წარდგენის საკითხზე კომენტირებისას.
რაც შეეხება სლოგანს, გამყრელიძის შეფასებით, სლოგანი "გასაკეთებელი ჯერ კიდევ ბევრია" კარგადაა შერჩეული, თუ გიგი უგულავას მიერ საქმის გაკეთებაში ეჭვი ეპარება.
"სლოგანზე ბევრია ნაფიქრი. ნამდვილად არ არის ცუდი სლოგანი. როგორც ჩანს, გადაწყვიტეს, რომ უფრო თავმდაბლურად წარმდგარიყვნენ ელექტორატის წინაშე. თუმცა, საზოგადოებას კარგად მოეხსენება, თუ როგორ აკეთებს საქმეს "ნაციონალური მოძრაობა". მგონია, რომ ამით არავინ მოტყუვდება", - განმარტავს გამყრელიძე.
ამასთან, "ალიანსის" თანათავმჯდომარის აზრით, მმართველმა ძალამ თბილისის მერის პოსტზე უგულავას კანდიდატურის დასახელება ხელოვნურად გააჭიანურა, რათა მას, როგორც ქალაქის მოქმედ მერს მეტი ადმინისტრაციული რესურსის გამოყენების საშუალება ჰქონოდა.
შეგახსენებთ, რომ "ნაციონალურმა მოძრაობამ" დღეს დილით ცესკოში საკუთარი საარჩევნო სია წარადგინა. მმართველი გუნდის რიგებიდან თბილისის მერობის კანდიდატად ოფიციალურად დარეგისტრირდა გიგი უგულავაც.
