როგორც უგულავამ Hჟურნალისტებს ცესკოში შესაბამისი დოკუმენტაციის წარდგენის შემდეგ განუცხადა, მისი თითოეული დაპირება, რომელსაც ის საარჩევნო კამპანიის ფარგლებში თბილისელებს მისცემს რეალისტური იქნება.

"ოფიციალურად დავრეგისტრირდი "ნაციონალური მოძრაობის" გუნდთან ერთად, როგორც თბილისის მერობის კანდიდატი. მომავალი 34 დღის განმავლობაში ჩვენ შევეცდებით ავუხსნათ თბილისელებს, თუ რის გაკეთებას ვაპირებთ. თითოეული დაპირება იქნება მოკრძალებული, საქმიანი და რეალისტური. რაც დედაქალაქს ახლა ყველაზე მეტად სჭირდება, ეს დასაქმება, უფრო მეტი უსაფრთხოება და სტაბილურობაა", - განუცხადა მერობის კანდიდატმა ჟურნალისტებს.

მისივე განმარტებით, ის საარჩევნო კამპანიას ხვალიდან შეუდგება, რის ფარგლებშიც ამომრჩევლების ყველა პრობლემას მოისმენს.

აღსანიშნავია, რომ თბილისის მერობის კანდიდატის გარდა, მმართველმა გუნდმა ცესკოში დღეს საარჩევნო სიაც წარადგინა.

აღსანიშნავია, რომ 68 კაციან სიას, რომელშიც 25 მაჟორიტარი დეპუტატობის კანდიდატია, დანარჩენი კი პროპორციულ სიას წარმოადგენს, კვლავ თბილისის საკრებულოს მოქმედი თავმჯდომარე ზაალ სამადაშვილი ხელმძღვანელობს. მეორე ნომერია არასამთავრობო ორგანიზაცია "ახალი თაობა - ახალი ინიციატივის" ყოფილი თავმჯდომარე კოკი იონათამიშვილი, მესამე - ხელოვნებათმცოდნე მარიან დიდებულიძე, მეოთხე - მწერალი ლაშა იმედაშვილი, ხოლო სიის მეხუთე ნომერი მერიის დასუფთავების სამსახურის უფროსი ტარიელ ხიზანიშვილია.