ზაფხულის ტურისტული სეზონის დასრულებამდე, ბათუმს კიდევ ერთი გასართობი ობიექტი შეემატება. ანბანის კოშკი ესპანურ კომპანია Boost Spain S.I.-ს მიმდინარე კვირის ბოლომდე გადაეცემა. რაც იმას ნიშნავს, რომ კოშკში მრავალფუნქციური ობიექტი აგვისტოს ბოლომდე გაიხსნება.
აჭარის მთავრობის მეთაურის, ბათუმის მერისა და კომპანია Boost Spain S.I. -ს შორის, 27 მარტს გაფორმებული ურთიერთშეთანხმების მემორანდუმის მიხედვით, ბათუმში, ზღვისპირა ბულვარში მდებარე 1344,7 კვ/მ შენობა-ნაგებობა (ანბანის კოშკი) და 5725 კვ/მ არასასოფლო-სამეურნეო დანიშნულების მიწის ნაკვეთი, 20 წლიანი იჯარით კომპანია Boost Spain S.I.-ს გადაეცა.
მემორანდუმის მიხედვით, Boost Spain S.I. -მა ვალდებულება აიღო, რომ ანბანის კოშკის სარგებლობის საფასურს 1 ლარს, ყოველი წლის ბოლო რიცხვამდე გადაიხდის.
კომპანიამ ასევე, შესაბამისი ხელშეკრულების გაფორმებიდან 1 თვეში, სარგებლობაში გადაცემული ქონების რესტავრაცია უნდა განახორციელოს, ხოლო 3 თვეში, ლიფტები ექსპლუატაციაში შეიყვანოს. ინვესტორმა ასევე, 3 თვეში განათების სისტემები უნდა გამართოს და ანბანის კოშკში მრავალფუნქციური ობიექტის (გასართობი ცენტრი, რესტორანი, ბარი და სხვა) გამართვა უზრუნველყოს. ასევე, ქალაქის ხედების დასათვალიერებლად უზრუნველყოს დურბინდის მოწყობა.
ურთიერთშეთანხმების მემორანდუმში ასევე აღნიშნულია, რომ მრავალფუნქციური ობიექტის ამოქმედებიდან სარგებლობის მთელი პერიოდის განმავლობაში, სარგებლობაში გადაცემული ნაგებობის, ლიფტების, გარე განათების სისტემების, მოვლა-პატრონობა და სარგებლობის ვადის ამოწურვის შემდეგ, მესაკუთრისათვის გამართულ მდგომარეობაში ჩაბარება უზრუნველყოს.
შესაბამისად, Boost Spain S.I.-ს კოშკის განათებისა და მოვლა-პატრონობის ხარჯებს თავად დაფარავს, როდესაც აჭარის ბიუჯეტს,ანალოგიური ხარჯი, წელიწადში 700 ათასი ლარი უჯდებოდა.
შეგახსენებთ, რომ თავის დროზე, ანბანის კოშკის მშენებლობა, ბიუჯეტს 65 მლნ ლარი დაუჯდა. “საოცრებათა პარკის” ტერიტორიაზე განთავსებული ქართული ანბანისადმი მიძღვნილი თანამედროვე არქიტექტურული ნაგებობის სიმაღლე 135 მეტრია. აღსანიშნავია, რომ ქართული ანბანის ოცდაცამეტივე ასო კოშკზე წარმოდგენილია მხედრულად, ხოლო ანბანის თითოეული ასოს სიგრძე 3 მეტრი და 70 სმ-ია. შენობა მთლიანად რკინისაა და მასში გადაადგილება მხოლოდ ლიფტითაა შესაძლებელი, რომელიც, თავის მხრივ, შემინულ პანორამულ კონსტრუქციას წარმოადგენს.
ქართული ანბანის კოშკი ბათუმის სიმბოლოდ ითვლება და სხვა შენობებისგან იმით გამოირჩევა, რომ იგი ქალაქში ერთ-ერთი მაღალი შენობაა. კოშკის სფერო სამ სართულიანია (ფართი 1252 კვ.მ.). ორი სართული განკუთვნილია მბრუნავი რესტორნისთვის და ოფისისთვის. სფერო ერთი საათის განმავლობაში ერთ სრულ ბრუნს ასრულებს, საიდანაც ქალაქის ხედები მოსჩანს.
მსოფლიოში არსებულ 14 დამწერლობათაგან ქართული დამწერლობა უნიკალური და უძველესია. ქართველი ხალხი მათი იდენტობის, ამ ლამაზი სიმბოლოსადმი სიყვარულს ოდითგანვე გამოხატავდა ხელოვნების სხვადასხვა ნიმუშსა და ნაწარმოებში. ქართული ანბანის ძეგლი არის გაკეთებული, სწორედ როგორც ქართველი ხალხის გენეტიკური კოდი და არც ერთ სხვა ანძას მსოფლიოში არ ჰგავს.
პროექტი ესპანელ არქიტექტორს ალბერტო დომინგო კაბოს ეკუთვნის.
