იუსტიციის მინისტრმა თეა წულუკიანმა აღსრულების ეროვნული ბიუროს პოლიციელებს პროფესიული დღე მიულოცა და სპეციალური ჯილდო გადასცა. მინისტრმა სპეციალური სახელმწიფო წოდება აღსრულების 13 პოლიციელს მიანიჭა . ბიუროს 10 თანამშრომელს კი სამსახურეობრივი მოვალეობის სანიმუშო შესრულებისთვის მადლობა გამოცუხადა. 8 პოლიციელს განსაკუთრებული სირთულის სამუშაოს შესრულებისა და კეთილსინდისიერი სამსახურისთვის საჩუქარი, მაჯის საათი გადასცა, კიდევ 4 პოლიციელს კი სპეციალური სახელმწიფო წოდება ვადაზე ადრე მიანიჭა.
"თქვენ ძალიან რთულ საქმეს ხართ შეჭიდებული. ამაყად და თამამად შეიძლება ითქვას, რომ აღსრულების პოლიციმ შეასრულა დავალება, რაც მე ახლად დანიშნულმა იუსტიციის მინისტრმა მოგეცით. ეს დავალება მდგომარეობდა იმაში, რომ საქართველოში აღარ მომხდარიყო მოქალაქეების ღირსების შემლახველი ხმაურიანი და ბავშვების შოკში ჩამგდები გამოსახლებები. ჩვენ შეგვიძლია ვთქვათ, რომ ეს დავალება შესრულებულია. აღსრულების ბიურო აკეთებს იმას, რომ თქვენი ჩარევა არ დაგვჭირდეს. თქვენთან ერთად მადლობა ეკუთვნის აღმსრულებლების ჯგუფს, ვინც ეს გაითავისა. თუკი თქვენი ჩარევა გვჭირდება, თქვენ იცით, რომ ეს არის უკიდურესი გამოსავალი, უკიდურესი ზომა. ყველაფერს ვაკეთებთ იმისთვის, რომ ის რთული საქმე, რაც მოქალაქეებთან შინ მისვლასთან არის დაკავშირებული თქვენთვის მაქსიმალურად, თუნდაც ფსიქოლოგიურად იყოს იოლი. მადლობას გიხდით მოთმინებისთვის, მონდომებისთვის, მოქალაქეების პატივისცემისთვის", - მიმართა აღსრულების პოლიციის თანამშრომლებს თეა წულუკიანმა.
მისი შეფასებით, აღსრულების პოლიცია დღეს უკეთეს მდგომარეობაშია, ვიდრე იყო ორი წლის წინ. მინისტრის თქმით, იგეგმება სიახლეები, კერძოდ, მთლიანად უნდა გადაიხედოს აღმასრულებლების მუშაობის მეთოდი და ჯგუფი. გარდა ამისა, როგორც წულუკიანმა აღნიშნა, არ არის გამორიცხული, რომ მოქალაქეთა ბინაზე მისულ აღმსრულებლებს სოციალური მუშაკები დაეხმარონ. "ეს ყველაფერი იმისთვის, რომ თქვენ ვინც ხართ ჩვენი სახე, მუშაობდეთ იმ პირობებში, რაც მოქალაქისთვის მაქსიმალურად უმტკივნეულო იქნება", - აღნიშნა თეა წულუკიანმა.
