თბილისის მუნიციპალიტეტის საკრებულოს თავმჯდომარე გიორგი ალიბეგაშვილი ვახტანგ გორგასლის სახელობის მოედანზე, საიათნოვასადმი მიძღვნილ „ვარდატონის“ - ვარდების ტრადიციულ დღესასწაულს დაესწრო.
საკრებულოს თავმჯდომარემ სახალხო ზეიმზე შეკრებილ საზოგადოებას სიტყვით მიმართა და დღესასწაული მიულოცა.
“ყველას გილოცავთ „ვარდატონის“ დღესასწაულს. მოგეხსენებათ, იოსებ გრიშაშვილმა და ჰოვანეს თუმანიანმა დააწესეს ის - სახელოვანი თბილისელ-სომეხი აშუღის - საიათნოვას საპატივცემლოდ, რომელიც ერთნაირად ძვირფასია, როგორც სომეხი, ასევე ქართველი ხალხისთვის“, - აღნიშნა გიორგი ალიბეგაშვილმა.
ღონისძიებაზე ასევე სიტყვით გამოვიდნენ: შერიგებისა და სამოქალაქო თანასწორობის საკითხებში სახელმწიფო მინისტრის მოადგილე - ქეთევან ციხელაშვილი, მწერალთა შემოქმედებითი კავშირის თანათავმჯდომარე - მაყვალა გონაშვილი, მთარგმნელი და მწერალი - გივი შაჰნაზარი, სომეხთა სამოციქულო მართლმადიდებელი წმინდა ეკლესიის ხელმძღვანელი საქართველოში, ეპისკოპოსი - ვაზგენ მირზახანიანი და სხვები.
საყოველთაო მილოცვების შემდეგ ღონისძიება კონცერტით გაგრძელდა, რომელზეც საგანგებოდ ამ დღისთვის სომხეთიდან ჩამოსულმა შემოქმედებმა თავიანთი პროგრამა წარმოადგინეს.
„ვარდატონის“ დღესასწაული წელს თბილისში 101-ჯერ ჩატარდა და სომხეთიდან ჩამოსული სტუმრები ესწრებოდნენ.
