გურჯაანის რაიონის სოფელ ველისციხეში საგანგებო მდგომარეობა ამ დრომდე შენარჩუნებულია. სამუშაოების სრულყოფილად ჩატარებას ძლიერი წვიმა აფერხებს.
ჭერმის წყალსაცავში, რომელიც სოფელ ველისციხის ნაწილს საფრთხეს უქმნის, წყლის დონემ კიდევ უფრო აიწია. მდინარე ჭერმის ხევიც ადიდდა.
როგორც "ჯი-ეიჩ-ენს" კახეთში პრეზიდენტის რწმუნებულის მოადგილემ გიორგი სიბაშვილმა განუცხადა სპეციალისტები მაქსიმუმს აკეთებენ, რათა დღის ბოლომდე ვითარება განიმუხტოს.
"ამჟამად მიმდინარეობს სამუშაოები, კეთდება ე.წ. "სიფონი", რომელიც სავარაუდოდ დღის ბოლომდე დასრულდება. პრობლემას წარმოადგენს ძლიერი წვიმა, რომელიც ამ დრომდე გრძელდება", - განუცხადა "ჯი-ეიჩ--ენს" სიბაშვილმა.
კახეთის საინფორმაციო ცენტრის ინფორმაციით, წუხელ შსს-ს სპეცრაზმმა და შს კახეთის სამხარეო მთავარი სამმართველოს თანამშრომლებმა ხევისუბნიდან ის ადამიანებიც გამოიყვანეს, რომლებმაც არაერთი გაფრთხილების მიუხედავად საცხოვრებელი სახლები არ დატოვეს.
სამართალდამცავებმა საუბნო გზები გადაკეტეს და რისკის ზონაში ადამიანებს აღარ უშვებენ. ადგილზე მობილიზებულია სასწრაფო სამედიცინო დახმარების რამდენიმე ბრიგადა. საგანგებო სიტუაციების დეპარტამენტის წარმომადგენლების განცხადებით, სამაშველო სამსახური სრულ მზადყოფნაშია.
