ბიზნესმენ დავით ბეგიაშვილის თქმით, უმრავლესობა სახელმწიფო მოხელეების, ვინც მონაწილეობდა მისი ბიზნესის წართმევაში წინა ხელისუფლების დროს, რჩებიან თანამდებობებზე. ამის შესახებ „ალბატროს ჯგუფის“ დამფუძნებელი „2030“-ის ეთერში განაცხადა.
„მე გამოვაქვეყნე 90-კაციანი სია ჩინოვნიკების, რომლებმაც გაილაშქრეს ჩემი კომპანიების წინააღმდეგ. უმრავლესობა გახლავთ თანამდებობებზე, უფრო მეტიც, ბევრი მათგანი დაწინაურებულია ახალი ხელისუფლების პირობებში“, - განაცხადა ქონებაწართმეულმა ბიზნესმენმა.
ამასთანავე დავით ბეგიაშვილმა აღნიშნა, რომ რამდენჯერმე საჯაროდ, პრესის საშუალებით, მიმართა საგამოძიებო ორგანოებს. გარდა ამისა, დავით ბეგიაშვილმა დაადასტურა, რომ მისი ქონება ამჟამად ეკონომიკის სამინისტროს ბალანსზე ირიცხება და მას მუდმივი კონტაქტი აქვს ხელისუფლების წარმომადგენლებთან. მან ასევე აღნიშნა, რომ მიიღო დაპირება მისი პრობლემის უახლოესს მომავალში გადაჭრის თაობაზე. ამასთანავე ბიზნესმენმა არ დააკონკრეტა, თუ ვისგან მიიღო ასეთი ტიპის დაპირება. შეგახსენებთ, ამჟამად დავით ბეგიაშვილი პოლიტიკური დევნილის სტატუსით შვეიცარიაში იმყოფება.
