თბილისში ხვალ სახალხო ზეიმი "აფხაზეთობა" აღინიშნება. აფხაზეთის ლეგიტიმური მთავრობის ინფორმაციით, სვიმონ კანანელის ხსენების დღეს, უწმინდესისა და უნეტარესის, სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის და ბიჭვინთისა და ცხუმ-აფხაზეთის მიტროპოლიტის, ილია მეორის ინიციატივით და ლოცვა კურთხევით, 23 მაისი "აფხაზეთობის"" დღედ დაწესდა.
ამ დღესთან დაკავშირებით, აფხაზეთის ავტონომიური რესპუბლიკის მთავრობის ორგანიზებით მთელი დღის განმავლობაში სხვადასხვა ღონისძიებაა დაგეგმილი. კერძოდ, ხვალ, 09:00 საათზე სიონის საკათედრო ტაძარში მოციქული სვიმონ კანანელის ხსენების დღესთან დაკავშირებით სადღესასწაულო წირვა აღევლინება.
10:30 საათზე აფხაზეთის ხელისუფლების წარმომადგენლები და დევნილი საზოგადოება გვირგვინით შეამკობენ გმირთა მემორიალს. საქართველოს ერთიანობისათვის დაღუპულ მებრძოლთა სულის მოსახსენიებელ პანაშვიდს გადაიხდიან.
11:00 საათზე კი ეთნოგრაფიულ მუზეუმში სახალხო დღესასაწაული ,,აფხაზეთობა"" საზეიმოდ გაიხსნება. მოეწყობა სხვადასხვა კულტურული ღონისძიება, სამხატვრო და ლიტერატურული კონკურსების გამარჯვებულთა დაჯილდოვება, აფხაზეთის კულტურული მემკვიდრეობის ამსახველი ფოტო-მასალების გამოფენა, სპორტული შეჯიბრებები, აფხაზეთის მხატვართა ნამუშევრების გამოფენა, ბავშვთა ნახატებისა და ხალხური რეწვის ნიმუშების გამოფენა, აფხაზეთის სახელოვნებო სკოლებისა და სასწავლებლების მოსწავლეთა კონცერტი, სადაც შესრულდება ქართულ-აფხაზური ცეკვები და სიმღერები.
18:00 საათზე საზეიმო დღესასწაული აფხაზეთის სიმღერისა და ცეკვის სახელმწიფო ანსამბლ ,,აფხაზეთის" ახალი საკონცერტოი პროგრამის პრეზენტაციით თბილისი არტ-ჰოლში დასრულდება.
ღონისძიებაზე მოწვეულები არიან საქართველოს აღმასრულებელი და საკანონმდებლო ხელისუფლებისა და საერთაშორისო ორგანიზაციების წარმომადგენლები, დიპლომატიური კორპუსი, აფხაზეთიდან დევნილი ინტელიგენცია.
სახალხო ზეიმზე დასწრება თავისუფალია.
