რუსეთის ფედერაცია ურანის საკითხებთან დაკავშირებით საქართველოს პრეზიდენტის მიხეილ სააკაშვილის ბრალდებებს აპროტესტებს. რუსეთის საგარეო საქმეთა სამინისტროს წარმომადგენელი იგორ ლიაკინ-ფროლოვი საქართველოს პრეზიდენტს სიცრუეში ადანაშაულებს.
მიხეილ სააკაშვილმა ვაშინგტონის ბირთვულ სამიტზე განაცხადა, რომ საქართველოში კონტრაბანდისტები დააკავეს, რომლებსაც გამდიდრებული ურანი აღმოაჩნდათ. მოგვიანებით, საქართველოს პრეზიდენტმა რუსეთი ურანით მოვაჭრეების ხელის შეწყობაში დაადანაშაულა.
ატომური ენერგიის საერთაშორისო სააგენტოში აცხადებენ, რომ მომხდარის შესახებ მათთვის ცნობილია და გამოძიებაში ჩართულნი არიან. შეერთებული შტატები კი საქართველოს საშიში მასალების გავრცელების აღკვეთისათვის მადლობას უხდის.
საგანგებო განცხადება, ამის შესახებ სახელმწიფო დეპარტამენტის წარმომადგენელმა ფილიპ ქროულიმ ბრიფინგზე გააკეთა. მისი თქმით, საქართველომ აჩვენა, რომ პასუხისმგებლობა აქვს და შეუძლია რეგიონში ურანის გავრცელება არ დაუშვას.
