გურჯაანის რაიონის სოფელ ველისციხეში კვლავ მობილიზებულია სახანძრო, სასწრაფო დახმარება, სამაშველო სამსახურები და საპატრულო პოლიცია.
ბრიგადებმა მთელი ღამე ეკოლოგიური რისკის ზონაში გაატარეს.
ველისციხის მოსახლეობის იმ ნაწილს რომელიც ჭერმის ტბის პირას ცხოვრობს გასული ღამე სახლში არ გაუთევია და დღეს დილიდანაც ისინი ნათესავებთან და ახლობლებთან რჩებიან. მოსახლეობა სამაშველო სამსახურების მითითებს ასრულებს.
თავად ჭერმის ტბასთან მუშაობს მძიმე ტექნიკა და სპეციალისტებთან ერთად მიმდინარეობს პრევენციული ღონისძიებების მიღება.
ადგილზე იმყოფება კახეთის გუბერნატორი გიორგი ღვინიაშვილი და ადგილობრივი ხელისუფლების სხვა წარმომადგენლები. ისინი აცხადებენ რომ პრევენციული ღონისძიებების გატარების შედეგად სტიქიის საფრთხე დღეს საღამოსათვის უნდა მოხსნას.
შეგახსნებთ, რომ გურჯაანის რაიონის სოფელ ველისციხიდან 600 ოჯახია ევაკუირებული. ძლიერი წვიმის შედეგად სოფელ ჭერმისთავში მდებარე წყალსაცავში მომატებულმა წყლის დონემ დამცავი ჯებირი დააზიანა, რის გამოც სოფელ ველისციხის დატბორვის საფრთხე შეიქმნა. რისკის ზონაში მცხოვრები მოსახლეობის ევაკუაცია სოფლიდან გვიანობამდე მიმდინარეობდა.
