ველისციხეში შინაგან საქმეთა მინისტრი ვანო მერაბიშვილი და რეგიონული განვითარების მინისტრი დავით ტყეშელაშვილი ჩავიდნენ. რისკის ზონაში მცხოვრები მოსახლეობის ევაკუაცია ამ დრომდე გრძელდება. ადგილზე მობილიზებულია შსს-ს საგანგებო სიტუაციების დეპარტამენტის მთელი შემადგენლობა, ასევე საპატრულო პოლიციის კახეთის სამმართველო.
როგორც "ჯი-ეიჩ-ენს" კახეთის საინფორმაციო ცენტრიდან აცნობეს, სასწრაფო სამედიცინო დახმარების ბრიგადებს ავადმყოფები გურჯაანის რაიონულ საავადმყოფოში გადაჰყავთ. გურჯაანში და სოფელ ველისციხესთან ახლოს მდებარე ბენზინგასამართი სადგურები კახეთის გუბერნატორის ადმინისტრაციის დავალებით 24 საათიან სამუშაო რეჟიმში გადავიდნენ. სოფელ ველისციხის მოსახლეობა ამ დრომდე პანიკაშია. ბევრმა ოჯახმა მიუხედავად იმისა, რომ რისკის ზონაში არ ცხოვრობს, სოფლიდან ბავშვები გაიყვანა.
გარემოს დაცვისა და ბუნებრივი რესურსების მინისტრის გოგა ხაჩიძის განცხადებით, წყლის მოვარდნა დიდწილად იმ შემთხვევაშია მოსალოდნელი თუ გაწვიმდება და წყალსაცავში წყლის დონე აიწევს. წყალსაცავში არსებულ მდგომარეობას გარემოს ეროვნული სააგენტოს სპეციალისტები აკვირდებიან. გადატვირთული მოძრაობის მიუხედავად, თელავი - თბილისის ავტომაგისტრალზე მოძრაობა თავისუფალია.
შეგახსენებთ, რომ წვიმების შედეგად სოფელ ჭერმის თავში მდებარე წყალსაცავში წყლის რაოდენობა გაიზარდა, დამცავი ჯებირი დაზიანდა და შესაძლოა, რომ წყალი გადმოვიდეს და ველისციხეს გადაუაროს.
