საქართველოს პირველი ლედი მაკა ჩიჩუა და ავსტრიის პირველი ლედი მარგიტ ფიშერი ბავშვთა ადრეული განვითარების ცენტრს “პორტიჯის”, თანმხლებ პირებთან ერთად ესტუმრნენ. ცენტრი სხვადასხვა შეზღუდული შესაძლებლობების მქონე ბავშვთა განვითარების პროგრამებს აერთიანებს.
აღსანიშნავია, რომ ავსტრიის პირველი ლედი 11 წელია შეზღუდული შესაძლებლობების მქონე პირთა საკითხებით არის დაკავებული, მათ შორის ბავშვებით. მარგიტ ფიშერი ორგანიზაციის დამფუძნებელი და კეთილი ნების ელჩია ამ მიმართულებით.
მათ ადგილზე ილიას სახელმწიფო უნივერსიტეტის რექტორი გიგა ზედანია, ბავშვის განვითარების ინსტიტუტის დირექტორი თინათინ ჭინჭარაული და ცენტრის ხელმძღვანელი ნინო ცინცაძე დახვდნენ.
პრეზიდენტის ადმინისტრაციის ინფორმაციით, სტუმრებმა შენობა დაათვალიერეს და ცენტრის მუშაობის სპეციფიკას გაეცნენ. თავის მხრივ მარგიტ ფიშერმა საკუთარი გამოცდილების შესახებაც ისაუბრა.
დღესვე, მაკა ჩიჩუამ და მარგიტ ფიშერმა ძველი თბილისი მოინახულეს.
ისინი ევროპისპარკიდან ნარიყალაზე გონდოლებით ავიდნენ. ფეხით ისეირნეს და ნარიყალას ციხესიმაგრე დაათვალიერეს.
საქართველოს პირველმა ლედიმ მარგიტ ფიშერს ძველი თბილისის ისტორია გააცნო.
ექსკურსია შემდგომ აბანოთუბანში გაგრძელდა, სადაც სამახსოვრო ფოტოები გადაიღეს.
ექსკურსიის დასრულების შემდგომ ორი ქვეყნის პირველი ქალბატონი საქართველოს ეროვნულ მუზეუმში გაემგზავრნენ სადაც მათ ავსტრიის პრეზიდენტი შეუერთდა და ერთად დაათვალიერეს მუზეუმში დაცული ეროვნული საგანძური.
