საქართველო ერთადერთია 8 პოსტსაბაჭოთა სახელმწიფოს შორის, რომლის სუვერენულ რეიტინგს სრეიტინგო სააგენტომ Moody’s -ი პროგნოზი „პოზიტიური“ შეუნარჩუნა.
Moody’s -ის ახალ ანგარიშში საქართველო დსთ-ს სივრცის ქვეყნებთან ერთად არის განხილული. ანგარიშში დსთ-ს ქვეყნების ეკონომიკებზე ნავთობის ფასების ვარდნისა და რუსეთის კრიზისის გავლენაა შეფასებული.
ანგარიშში 2015-2016 წლების პერსპექტივებია განხილული.
გავლენიანი სარეიტინგო სააგენტო ელის, რომ დსთ-ს სივრცისთვის გამოწვევები 12-18 თვის განმავლობაშია მოსალოდნელი და გაგრძელდება რუსეთის რეცესიის უარყოფითი გავლენა დსთ-ს ქვეყნების მაკროეკონომიკურ გარემოზე.
Moody’s -მა 4 ქვეყნის რეიტინგს პროგნოზი „ნეგატიური“ განუსაზღვრა, სამ ეკონომიკას „სტაბილური“. საქართველო ერთადერთია, რომლის სახელმწიფო ობლიგაციების რეიტინგს (Ba3) „პოზიტიური“ პერსპექტივა შეუნარჩუნდა.
Moody’s -ი საქართველოსთვის დადებით ფაქტორად ასახელებს თავისუფალი ვაჭრობის ხელშეკრულებას ევროკავშირთან, რომელიც მათი შეფასებით, საშუალოვადიან პერიოდში, საქართველოს საგარეო პოზიციის გაუმჯობესების მოლოდინებს ქმნის.
ამვე დროს, Moody’s -ი ელის, რომ აზერბაიჯანი და ყაზახეთი იქნებიან საუკეთესო პოზიციაზე დსთ-ს ქვეყნებს შორის, ვინაიდან ორივე მათგანს აქვს დიდი სარეზერვო ბუფერები და არ არიან ძალიან დაკავშირებულნი უკრაინის კრიზისთან.
სააგენტოს ექსპეტები აღნიშნავენ, რომ ენერგომატარებლების იმპორტიორი 5 ქვეყანაში (საქართველო, მოლდოვა, უკრაინა, სომხეთი და ბელარუსი) ნავთობის ფასების შემცირებით მისაღებ დადებით ეფექტს გადაწონის რეცესია რუსეთში. აღსანიშნავია, რომ საქართველო ამ ხუთ ქვეყანას შორის დადებითად არის მოხსენიებული, როგორც ქვეყანა, სადაც არის დაბალი ინფლაცია და სახელმწიფო საგარეო ვალის დაბალი დონე.
