20 აპრილს კიტოში გაიმართა პოლიტიკური კონსულტაციები საქართველოსა და ეკვადორის საგარეო საქმეთა სამინისტროებს შორის, საგარეო საქმეთა მინისტრის მოადგილეების დონეზე. საქართველოს საგარეო საქმეთა სამინისტროს დელეგაციას ხელმძღვანელობდა მინისტრის მოადგილე ალექსანდრე ნალბანდოვი, ხოლო ეკვადორის მხრიდან კონსულტაციებში მონაწილეობდა მინისტრის მოადგილე ლეონარდო არიზაგა.
შეხვედრისას განხილულ იქნა საქართველო - ეკვადორს შორის პოლიტიკური, ეკონომიკური და კულტურული ურთიერთობების განვითარების პერსპექტივები და ასევე განისაზღვრა თანამშრომლობის კონკრეტული სფეროები და მიმართულებები, როგორც ორმხრივ, ასევე მრავალმხრივ ფორმატში.
მხარეები შეთანხმდნენ უახლოეს მომავალში ორი ქვეყნის საგარეო უწყებას შორის თანამშრომლობის მემორანდუმის გაფორმების თაობაზე.
შეხვედრისას ეკვადორის მხარემ დააფიქსირა თავისი ურყევი ერთგულება საერთაშორისო სამართლის უმთავრესი ნორმებისადმი, რომელიც ითვალისწინებს ქვეყნის სუვერენიტეტისა და ტერიტორიული მთლიანობის პრინციპის უზენაესობას.
