რა სანქციები დაეკისრება იმ ავიაკომპანიებს, რომლებიც ოკუპირებული აფხაზეთის ტერიტორიაზე საჰაერო რეისებს ახორციელებენ, დღეს გახდება ცნობილი.
ტრანსპორტის სფეროში სოხუმის რეჟიმისა და რუსეთის თანამშრომლობის საკითხსა და სხვა უკანონო ქმედებებზე სასაუბროდ შეერთებულ შტატებში საქართველოს ელჩი ბათუ ქუთელია დღეს სამოქალაქო ავიაციის საერთაშორისო ორგანიზაციის IKAO-ს ხელმძღვანელობას შეხვდება.
აღნიშნული შეხვედრის ორგანიზება საელჩოს საქართველოს პარლამენტის შესაბამისმა კომიტეტმა და საგარეო საქმეთა სამინისტრომ ერთობლივი გადაწყვეტილების საფუძველზე დაავალა.
აღსანიშნავია, რომ გრიგოლ ვაშაძის უწყებამ IKAO-ს სპეციალური ნოტითაც მიმართა და მისგან უკანონო ფრენებთან დაკავშირებით შესაბამისი ღონისძიების გატარება მოითხოვა.
გაეროში საქართველოს ელჩის კახა ლომაიას განცხადებით, "სოხუმის საჰაერო სივრცე საქართველოს საჰაერო სივრცეა და საქართველოს ხელისუფლების ნებართვის გარეშე ამ სივრცეში ფრენების განხორციელება საერთაშორისო სამართლით აკრძალულია".
