ცენტრალური საარჩევნო კომისიის თავმჯდომარის ზურაბ ხარატიშვილის შეფასებით, ამომრჩეველთა ერთიანი სია სრულყოფილი არ არის, თუმცა მისი სიზუსტის ხარისხი მნიშვნელოვნად გაუმჯობესებულია.
"სიის სრულყოფა უსასრულო პროცესია და მას მუდმივი გადამოწმება სჭირდება. აქედან გამომდინარე, შეიძლება ითქვას, რომ ამომრჩეველთა ერთიანი სიის სიზუსტის ხარისხი, ცესკოსა და პოლიტიკური პარტიების მიერ განხორციელებული მონიტორინგის შედეგად, მნიშვნელოვნად გაუმჯობესებულია", - განუცხადა ხარატიშვილმა "ჯი-ეიჩ-ენს" აღნიშნულ საკითხზე კომენტირებისას.
შეგახსენებთ, რომ ცენტრალურმა საარჩევნო კომისიამ დღეს, სასტუმრო "ქორთიად-მარიოტში" ამომრჩეველთა სიების მონიტორინგის საბოლოო შედეგების პრეზენტაცია გამართა.
როგორც ხარატიშვილმა უშუალოდ სიის პრეზენტაციაზე განაცხადა, ცესკოსა და პოლიტიკურ პარტიებს შორის თანამშრომლობის ის პრაქტიკა, რაც მონიტორინგის პროცესში არსებობდა, მისი მნიშვნელობიდან გამომდინარე უნდა გაგრძელდეს, რადგან ის შესაძლოა ნდობაზე დაფიძვნებული საარჩევნო სისტემის ჩამოყალიბების საფუძველი გახდეს.
"ჩვენ მოვუწოდებთ საარჩევნო გარემოს გაუმჯობესებით დაინტერესებულ მხარეებს, დაიწყონ დისკუსია არჩევნებისა და მთლიანად საარჩევნო პროცესისადმი ნდობის ამაღლებისთვის კონკრეტული ნაბიჯების დასახვის მიზნით", - განაცხადა ხარატიშვილმა, რომელმაც ამომრჩეველთა სიის გადამოწმების პროცესში აქტიური მონაწილეობისთვის მასში ჩართულ ყველა პოლიტიკურ სუბიექტს მადლობა გადაუხადა.
როგორც ცნობილია, პარტიებს ამომრჩეველთა სიის მონიტორინგში ჩართვის შესაძლებლობა, საარჩევნო კანონმდებლობაში, 2009 წლის 28 დეკემბერს შეტანილი ცვლილებების საფუძველზე, პირველად მიეცა.
რაც შეეხება უშუალოდ მონიტორინგის შედეგებს, სიებში სულ 149 ათასზე მეტი მონაცემის ჩასწორება მოხდა, აქედან 133 ათასზე მეტი უშუალოდ ცესკოს მიერ, 16 ათასი კი (13 ათასი მისამართი და 3 ათასუ გარდაცვლილი) პოლიტიკური პარტიების მიერ განხორციელებული შესაბამისი პროცესის შედეგად განხორციელდა.
სიებში აღმოჩენილი უზუსტობებიდან 19,815 ამომრჩეველთა სახელებს, 33,766 - გვარებს, 24,284 დაბადების თარიღებს, 55,094 მისამართებს, 63 შემთხვევა - ერთ ბინაში რეგისტირებულ ოც და მეტ ამომრჩეველს, 225 დუბლირების შემთხვევას, 2,825 გარდაცვილი ამომრჩევლის აღმოჩენას შეეხებოდა. სხვა შემთხვევევის გამო სიებიდან ამოღებულ იქნა 219 ამომრჩელის მონაცემი, 12,925 კი ჩასწორდა. ამ უკანასკნელისა და ასევე გამოტოვებული ამომრჩევლების მონაცემების მიმართულებით ცესკო ამ დრომდე მუშაობს.
მონიტორინგის შედეგად, საქართველოს ამომრჩეველთა რაოდენობა 3 580 487 საარჩევნო ასაკის მქონე მოქალაქით განისაზღვრა.
