განსახილველ საკითხთა ნუსხაში შეტანილია „სახელმწიფო საიდუმლოების შესახებ" კანონპროექტის მეორე მოსმენით განხილვა. პროექტით ხდება სახელმწიფო საიდუმლოების დაცვასა და მის გამოყენებასთან დაკავშირებული მთელი რიგი საკითხების ახლებური დარეგულირება და დახვეწა. კერძოდ, კანონპროექტი მოქმედი „სახელმწიფო საიდუმლოების შესახებ" საქართველოს კანონში მოცემულ ტერმინებთან ერთად ითვალისწინებს ისეთ ცნებებსაც, როგორიცაა შემოწმების პროცედურა, სახელმწიფო საიდუმლოების შემცველ ინფორმაციასთან მოპყრობა, საიდუმლო კონტრაქტი, ინფორმაციის გაცნობის საჭიროება. კანონპროექტით გამიჯნულია სახელმწიფო საიდუმლოებასთან ინდივიდუალური და იურიდიული პირის დაშვების შემთხვევები. კანონპროექტი ითვალისწინებს კომუნიკაციისა და ინფორმაციის სისტემის შემოღებას, რომელიც იძლევა სახელმწიფო საიდუმლოების შემცველ ინფორმაციასთან ელექტრონული ფორმით მოპყრობის შესაძლებლობას. ზუსტდება აგრეთვე დაზვერვის, სახელმწიფო უსაფრთხოებისა და მართლწესრიგის დაცვის სფეროში სახელმწიფო საიდუმლოებას მიკუთვნებული ცნობების ჩამონათვალი. ამასთან, კონკრეტდება, თუ რა ტიპის ინფორმაცია განეკუთვნება სახელმწიფო საიდუმლოებას ეროვნული ბანკის საქმიანობასთან დაკავშირებით.

პლენარულ სხდომაზე პირველი მოსმენით იქნება განხილული კანონპროექტი „ზოგადი განათლების შესახებ" საქართველოს კანონში ცვლილების შეტანის თაობაზე". კანონპროექტით ხდება „ზოგადი განათლების შესახებ" საქართველოს კანონის შესაბამისობაში მოყვანა საქართველოს საკონსტიტუციო სასამართლოს გადაწყვეტილებასთან და კანონიდან ამოდის მუხლი, რომელიც ითვალისწინებს უცხო ქვეყნის მოქალაქისა და მოქალაქეობის არმქონე პირის ვაუჩერულ დაფინანსებას. ამასთან, სახელმწიფოს მიერ ზოგადი განათლების დაფინანსება გავრცელდება საქართველოს მოქალაქეზე, პირადობის ნეიტრალური დოკუმენტის ან ნეიტრალური სამგზავრო დოკუმენტის მქონე პირზე, უცხო ქვეყნის მოქალაქეზე, მათ შორის, უცხოეთში მცხოვრებ თანამემამულის სტატუსის მქონე უცხო ქვეყნის მოქალაქეზე და მოქალაქეობის არმქონე პირზე.

ასევე პირველი მოსმენით იქნება განხილული კანონპროექტი „ეროვნული უსაფრთხოების პოლიტიკის დაგეგმვისა და კოორდინაციის წესის შესახებ" და მისი თანმდევი ცხრა კანოპროექტი.
ბიუროს წევრების გადაწყვეტილებით, შესაბამის კომიტეტებში რამდენიმე ახალი საკანონმდებლო ინიციატივის განხილვის პროცედურა დაიწყება, მათ შორისაა კანონპროექტი „ჯანმრთელობის დაცვის შესახებ" კანონში ცვლილების შეტანის თაობაზე", რომლის თანახმად, უქმდება სამედიცინო მედიაციის სამსახური.
ბიუროზე მიღებული გადაწყვეტილების თანახმად, 4-6 თებერვლის პლენარული სხდომების დღის წესრიგს რამდენიმე საკითხი დაემატა, კერძოდ:• საქართველოს პრეზიდენტის მიერ ცენტრალური საარჩევნო კომისიის სამ ვაკანტურ თანამდებობაზე ასარჩევად წარმოდგენილი კანდიდატების საკითხი; პარლამენტის წევრების: მანანა კობახიძის, დავით საგანელიძის, გედავან ფოფხაძის, ზვიად კვაჭანტირაძისა და პაატა კიკნაველიძის მიერ საკანონმდებლო ინიციატიცის წესით წარმოდგენილი კანონპროექტი "საქართველოს სისხლის სამართლის საპროცესო კოდექსში ცვლილების შეტანის შესახებ" (კანონპროექტის მიხედვით, მცირდება ნაფიც მსაჯულთა განსაჯადობას მიკუთვნებულ დანაშაულთა წრე, კერძოდ, ნაფიც მსაჯულთა სასამართლო განსჯადობა აღარ მოიცავს „საჯარო სამსახურში ინტერესთა შეუთავსებლობისა და კორუფციის შესახებ" კანონში მითითებული პირის ბრალდების საქმეებს და მათზე გავრცელდება სისხლის სამართლის საქმეთა განხილვის საპროცესო კოდექსით დადგენილი ზოგადი ნორმები);საფინანსო-საბიუჯეტო კომიტეტის მიერ წარმოდგენილი პარლამენტის დადგენილების პროექტი „სახელმწიფო აუდიტის სამსახურის 2014 წლის ფინანსური აუდიტის შემმოწმებელი საქართველოს პარლამენტის დროებითი კომისიის შექმნის მიზანშეწონილობის შესახებ";• საპარლამენტო უმცირესობაში შემავალი ფრაქციების მიმართვა დროებითი საგამოძიებო კოისიის შექმნის შესახებ და საპარლამენტო უმცირესობაში შემავალი ფრაქციების მიერ წარმოდგენილი პარლამენტის დადგენილების პროექტი „იური და ზურა ვაზაგაშვილების, ბარბარე რაფალიანცის, გოგი თავთუხაშვილის, ეროსი კიწმარიშვილისა და აჩიკო მაისურაძის შეკვეთილი მკვლელობების ფაქტების შემსწავლელი დროებითი საგამოძიებო კომისიის შექმნის მიზანშეწონილობის თაობაზე".