ამერიკული გამოცემა The New York Times -ი იმ ქვეყნებისა და ადგილების სიას აქვეყნებს, სადაც 2015 წელს მოგზაურობა სასურველია. გამოცემის ინფორმაციით, 2015 წლისთვის ტურისტულად სასურველი 52 ქვეყნიდან საქართველო 25-ე ადგილზეა.
გამოცემა თითოეული ქვეყნის უპირატესობას აღწერს და იმ მიზეზებს ასახელებს, რის გამოც, მოქალაქეებმა დასახელებულ ქვეყნებში უნდა იმოგზაურონ.
აღნიშნულ სიაში პირველ ადგილს იტალია, კერძოდ კი, მილანი იკავებს, რომელსაც კუბა, ფილადელფია და იელოუსტოუნის ეროვნული პარკი მოყვება. საერთაშორისო ბიოსფერული ნაკრძალი ამერიკის შეერთებულ შტატებში მდებარეობს.
ქვეყნებს შორის მეხუთე ადგილს ჩილე ღვინის რეგიონით იკავებს. ათეულში ასევე, შედის სინგაპური, სამხრეთ აფრიკის უდიდესი ქალაქი დურბანი, ბოლივია, ფარერის კუნძულები და მაკედონია.
რაც შეეხება საქართველოს, იგი აღნიშნულ ქვეყნებში 25-ე ადგილს კავკასიონის მთის ძირას ღვინის კულტურის აღორძინების კუთხით იკავებს. გამოცემა წერს, რომ საქართველოს აქვს ყველაფერი იმისთვის, რათა ღვინის დანიშნულების ქვეყანა იყოს: მსოფლიოში ყველაზე გრძელი და უწყვეტი ღვინის ტრადიცია (თიხის ჭურჭელში ყურძნის მიწისქვეშა დუღილი), ასობით ადგილობრივი ყურძნის ჯიშები, განსაცვიფრებელი პეიზაჟები და მეღვინეები, რომლებიც ღვინის დასაყენებლად ბუნებრივ მეთოდებს იყენებენ.
საქართველოს დედაქალაქ თბილისში ღვინის ბევრი ბარია (კონკა, მიწისქვეშა ღვინო). აღსანიშნავია ღვინის ადგილები და კახეთის ღვინის ქარხნები (ხოხბის ცრემლები, იაგოს მეღვინეობა, მეღვინეობა ხარება), სადაც მოქალაქეებს ტრადიციულ და თანამედროვე ქართულ კერძებსაც სთავაზობენ.
ღვინის აღნიშნული ჯიშების გამოყენებით მიმდინარე წელს ოთხი მთავარი მოვლენა ჩატარდება. კერძოდ, ახალი ღვინის ფესტივალი, ღვინის ქალაქი თბილისი, „თელავინო" და თბილისის ყველის ფესტივალი.
საქართველოში ასევე, შესაძლებელია ახალი ადგილობრივი საწარმოების გაცნობა, რომლებსაც ქართული ტრადიციული სამზარეულოს დაგემოვნება და ღვინის ტურების მოწყობა შეუძლიათ. ღვინოსთან ერთად, ადგილობრივი კერძების დაგემოვნება კახეთსა და მის ფარგლებს გარეთაც შესაძლებელია.
52-ე ქვეყანას შორის, საქართველოს შემდეგ ინგლისი, კერძოდ, მანჩესტერი, მექსიკა, გრენლანდია, პაპუა ახალი გვინეა, ორეგონი, მაროკო, კანადა და სამხრეთ კორეა, კერძოდ, კი სეული მოდის. სიის ბოლოს კი, შანხაი, ოკლაჰომა, რომი, ბაქო და თურქეთი მოხვდნენ.
