პოლონეთის პრეზიდენტი ლეხ კაჩინსკი, რომელიც 10 აპრილს თვითმფრინავის ჩამოვარდნის შედეგად დაიღუპა, "ყოველთვის ემახსოვრებათ, როგორც პოლონეთის ისტორიის, ევროპის ისტორიის და რა თქმა უნდა, ჩემი რეგიონის გამორჩეული ფიგურა," განაცხადა პრეზიდენტმა სააკაშვილმა CNN-ისთვის მიცემულ ინტერვიუში სააკაშვილმა. მისივე თქმით, რომ კაჩინსკი იყო "დიდი სიმამაცის, დიდი გულის და პრინციპების ადამიანი".
"ახალგაზრდა პოლიტიკოსი ვიყავი, როდესაც პირველად შევხვდი მას და მას შემდეგ ჩვენ ახლო მეგობრები გავხდით და მე არასდროს დამიძახია მისთვის პრეზიდენტი, მე მას ლეხს ვეძახდი", - განაცხადა სააკაშვილმა ინტერვიუში.
"თუ მომიწევდა დასახელება, თუ ვინ ითამაშა ყველაზე საოცარი როლი საქართველოს თავისუფლების, საქართველოს მომავლისთვის ბრძოლის თვალსაზრისით, ამ სიაში ყველაზე მაღლა პრეზიდენტ კაჩინსკის დავაყენებდი. და ეს გაზვიადება არ არის. ვფიქრობ, ჩემი თანამემამულეები ასე ფიქრობენ. ჩვენ ვნახეთ მისი სიმამაცე, ჩვენ ვნახეთ მისი პირადი ერთგულება", - განაცხადა მან.
სააკაშვილმა ასევე განაცხადა, რომ "რაღაც დაუჯერებელ ბოროტებას აქვს ადგილი" პოლონეთის პრეზიდენტის ტრაგიკულ სიკვდილთან დაკავშირებით.
კითხვაზე, თუ რას გულისხმობდა ის "ბოროტებაში", სააკაშვილმა უპასუხა: "მე ვგულისხმობ იმ ფორმას, თუ როგორ მოკვდა ის. რა თქმა უნდა, ამაში არის გარკვეული სიმბოლიზმი. არ მინდა ამაზე კომენტარის გაკეთება".
"საბოლოო ჯამში, მიმაჩნია, რომ ის, რასაც მან მიაღწია, ის მემკვიდრეობა, რომელსაც ის ტოვებს ემოციების, პოლიტიკის, ადამიანური ურთიერთობების, მისი გულის სითბოს თვალსაზრისით... ყველაფერ დანარჩენს გაუძლებს და ეს იქნება ის, რაც თაობებს და თაობებს გაყვება," - განაცხადა სააკაშვილმა.
"ვფიქრობ, რომ საბოლოოდ მისი იდეალები გაიმარჯვებს, კეთილი ყოველთვის გაიმარჯვებს ბოროტებაზე," - დასძინა მან.
პოლონეთის პრეზიდენტის თვითმფრინავი სმოლენსკის აეროპორტის მახლობლად ჩამოვარდა, რის შედეგადაც თვითმფრინავში მყოფი 96 მგზავრი დაიღუპა. პრეზიდენტისა და მისი მეუღლის გარდა, მგზავრებს შორის იყვნენ ეროვნული ბანკის პრეზიდენტი და ქვეყნის შეიარაღებული ძალების სარდლობა. პოლონეთის დელეგაცია ვარშავიდან სმოლენსკში მიემგზავრებოდა, რათა პატივი მიეგოთ საბჭოთა დროს კატინში მასობრივი რეპრესიების დროს დაღუპული პოლონელების ხსოვნისთვის.
www.civil.ge
