საქართველოს საგარეო საქმეთა სამინისტრო ღრმა მწუხარებას გამოთქვამს პოლონეთის პრეზიდენტის ლეხ კაჩინსკის, მისი მეუღლისა და დელეგაციის სხვა წევრების დაღუპვის გამო.
ოფიციალური თბილისის შეფასებით, პოლონეთის პრეზიდენტის გარდაცვალება თავისუფალი და დემოკრატიული სამყაროსთვის მნიშვნელოვანი დანაკლისი იქნება.
ლეხ კაჩინსკის ტრაგიკულად დაღუპვასთან დაკავშირებით საქართველოს საგარეო საქმეთა სამინისტრომ დღეს სამძიმრის ოფიციალური წერილი გაავრცელა.
"ქართველი ხალხი ლეხ კაჩინსკის გარდაცვალებას აღიქვამს, როგორც პირად ტრაგედიას და თანაუგრძნობს პოლონელ ხალხს. პრეზიდენტი კაჩინსკი იყო თავისუფლებისთვის ბრძოლის სიმბოლო. მისი გარდაცვალება უდიდესი დანაკლისია თავისუფალი და დემოკრატიული სამყაროსთვის", - განუცხადა საგარეო უწყების ხელმძღვანელის მოადგილე ნინო კალანდაძემ ჟურნალისტებს.
მისივე განმარტებით, პოლონეთის საელჩოში სამძიმრის წიგნი გაიხსნება, სადაც სამძიმრის გამოხატვა ნებისმიერ მსურველს შეეძლება.
ქართული დელეგაცია პოლონეთში ჩასვლასაც გეგმავს. შეგახსენებთ, რომ კაჩინსკის დაკრძალვას დაესწრება საქართველოს პრეზიდენტიც, რომელიც მომხდარის გამო აშშ-ში ვიზიტს ერთი დღით შეწყვეტს.
