საუკეთესო HR პროექტად კომპანია „ვისოლის" HR პროექტი აღიარეს. პირველად საქართველოში „HR პროფესიონალთა გილდიამ" საუკეთესო HR პროექტი გამოავლინა. როგორც „HR პროფესიონალთა გილდიაშო" განმარტავენ, საკონკურსო განაცხადის წარდგენა საქართველოში მოღვაწე HR პროფესიონალებს მიმდინარე წლის ოქტომბრამდე შეეძლოთ. დაჯილდოებისა და საუკეთესო HR პროექტის გამოვლენა დღეს სასტუმრო „თბილისი მარიოტში" შედგა. 12 განაცხადიდან ერთი საუკეთესო და ოთხი HR პროექტის ავტორებმა სხვადასხვა საინტერესო პრიზებთან ერთად, კვალიფიკაციის ამაღლებას მსოფლიოს წამყვან HR სააგენტოებში შეძლებენ.
კომპანია „ვისოლის" HR დეპარტამენტის უფროსის რუსუდან სანიკიძის განმარტებით, „ვისოლისთვის" აღნიშნული პრიზის მიღება მნიშვნელოვანია და კომპანიას დიდ პასუხისმგებლობასაც ანიჭებს. სანიკიძის განმარტებით, კომპანია ყველაფერს აკეთებს და გააკეთებს, რომ მაღალი კვალიფიკაციის კადრები შემოიკრობოს და მომხმარებელს მაღალი ხარისხის მომსახურება შესთავაზოს.
„HR პროფესიონალთა გილდია" ქვეყნის ბიზნეს სექტორში ადამიანური რესურსების ეფექტური მართვის კუთხით განხორციელებული წარმატებული პროექტების დაჯილდოებით HR პროფესიონალთა წახალისებასა და ადამიანური რესურსების მართვის თანამედროვე მეთოდების დანერგვის სტიმულირებას ისახავს მიზნად.
"საქართველოს მსხვილი და საშუალო ბიზნეს სექტორისთვის ძალზედ მნიშვნელოვანია ადამიანური რესურსების მართვისა და HR პროფესიონალთა შესაძლებლობების სიღრმისეულად გააზრება ბიზნესის მდგრადობისა და შემდგომი განვითარებისთვის. ამისათვის, საუკეთესო საშუალებაა საქართველოსბიზნეს სექტორში უკვე განხორციელებული პროექტებისა და მათი შედეგების შესახებ ინფორმაციის გასაჯაროება. აღნიშნული საშუალებას მისცემს ბიზნესს გაეცნოს იმ მატერიალურ სიკეთეს, რასაც მხოლოდ სწორად და პროფესიულად განსაზღვრული და წარმართული ადამიანური რესურსების მართვისა და განვითარების პოლიტიკის შედეგად შეიძლება დადგეს. შესაბამისად, საქართველოს ბიზნეს სექტორში უკანასკნელი სამი წლის პერიოდში განხორციელებული საუკეთესო HR პროექტის გამოვლენა კონკურსის გზით და უკვე აპრობირებული წარმატებული გამოცდილების საზოგადოებისათვის გაზიარება, ვფიქრობ, მნიშვნელოვანი ნაბიჯი იქნება აღნიშნულის მისაღწევად", აცხადებს„HR პროფესიონალთა გილდიის" აღმასრულებელი დირექტორი ლილი ბიბილაშვილი.
წლის საუკეთესო HR პროექტის გამოვლენა სახელმწიფო, არასამთავრობო, საგანმანათლებლო სექტორის წარმომადგენლებითა და პროფესიონალი HR სპეციალისტებით დაკომპლექტებული საკონკურსო კომისიის მიერ მოხდა.