ვიცე-პრემიერი, ეკონომიკისა და მდგრადი განვითარების მინისტრი საქართველოს პრეზიდენტის დელეგაციასთან ერთად ოფიციალური ვიზიტით თურქმენეთში იმყოფება. ოფიციალური საზეიმო დახვედრისა და შეხვედრების შემდეგ აშხაბადში, ,,ოგუზხანის" საპრეზიდენტო სასახლეში საქართველოსა და თურქმენეთის მთავრობებს შორის ოფიციალური დოკუმენტები გაფორმდა. საქართველოს მხრიდან ოფიციალურ დოკუმენტებს ხელი მოაწერეს საქართველოს პრეზიდენტმა გიორგი მარგველაშვილმა, ვიცე-პრემიერმა, ეკონომიკისა და მდგრადი განვითარების მინისტრმა, გიორგი კვირიკაშვილიმა და საქართველოს სავაჭრო-სამრეწველო პალატის პრეზიდენტმა კახა ბაინდურაშვილმა. გიორგი კვირიკაშვილმა ხელი მოაწერა ურთიერთგაგების მემორანდუმს ორ ქვეყანას შორის ტრანსპორტის სფეროში თანამშრომლობის ძირითადი მიმართულებების შესახებ.
დოკუმენტს ხელი საქართველოს მთავრობის მხრიდან ვიცე-პრემიერმა გიორგი კვირიკაშვილმა მოაწერა. ხოლო თურქმენული მხრიდან თურქმენეთის მინისტრთა კაბინეტის თავმჯდომარის მოადგილემ ტრანსპორტისა და კომუნიკაციების საკითხებში სატლიკ სატლიკოვმა.
მხარეები აღიარებენ, რომ ტრანსპორტის ეფექტიანი ფუნქციონირება წარმოადგენს საქართველოსა და თურქმენეთის ეკონომიკის განვითარების უმნიშვნელოვანეს ფაქტორს. მემორანდუმის საფუძველზე მხარეები შეთანხმდნენ უზრუნველყონ ხელსაყრელი პირობები ორ ქვეყანას შორის სატვირთო და სამგზავრო მიმოსვლის გამარტივების მიზნით და ასევე, მათი სახელმწიფოს ტერიტორიების გავლით ტრანზიტად მესამე სახელმწიფოებში. მემორანდუმში ასევე აღნიშნულია, რომ მხარეები ხელს შეუწყობენ პირდაპირი ეკონომიკური კავშირების განვითარებას ორივე სახელმწიფოს სატრანსპორტო კომპანიებსა და ორგანიზაციებს შორის და ასევე, სატრანსპორტო სფეროში ერთობლივი საწარმოების შექმნას.
საქართველოს ვიცე-პრემიერმა გიორგი კვირიკაშვილმა და თურქმენეთის მინისტრთა კაბინეტის თავმჯდომარის მოადგილემ მეცნიერების, უახლესი ტექნოლოგიებისა და ინოვაციების საკითხებში საფარმურდი ტოილიევმა ხელი მოაწერეს შეთანხმებას ორი ქვეყნის მთავრობებს შორის ტურიზმის სფეროში თანამშრომლობის შესახებ. შეთანხმებაში ხაზგასმულია, რომ თანამშრომლობა უნდა განვითარდეს ინდივიდუალური ტურიზმის წახალისებითა და ორგანიზებული ჯგუფების გაცვლით, ტურიზმის სფეროში ერთობლივი პროექტების ხელშეწყობით, ექსპერტების გაცვლითა და ტურიზმის სფეროსა და სასტუმრო სექტორში კადრების მომზადების ხელშეწყობით.
"ოგუზხანის" საპრეზიდენტო სასახლეში საქართველოსა და თურქმენეთს შორის ოფიციალური დოკუმენტების ხელმოწერის ცერემონიას ორი ქვეყნის მთავრობის წარმომადგენლები ესწრებოდნენ.
