საპარტნიორო ფონდმა, საერთაშორისო საკონსულტაციო კომპანია Kohl & Partner-თან ერთად დაასრულა წყალტუბოს კურორტის შესაძლებლობების კვლევა და მისი განვითარების კონცეფცია შეიმუშავა.
კონცეფციის თანახმად, წყალტუბოს საკურორტო ზონის რეაბილიტაცია ორფაზიანია და რამდენიმე ეტაპს მოიცავს. იგი რამდენიმე წელი გაგრძელდება და მოიცავს თერმული აბანოების აღდგენას, სახელმწიფო საკუთრებაში არსებულ სასტუმროების რეაბილიტაციას, თანამედროვე ტექნიკით და სამედიცინო აპარატურით აღჭურვილი სასტუმროების აშენებას, სამედიცინო და სპა ტურიზმის განვითარებას, საბავშვო გასართობი ცენტრების და წყლის ატრაქციონების აშენებას, რესტორნების განვითარებას, გოლფის სათამაშო მოედნის მოწყობას, სავაჭრო ცენტრების გახსნას და ტროპიკული ბაღების გაშენებას.
კურორტის განვითარების შედეგად შეიქმნება ასეულობით დამატებითი სამუშაო ადგილი და ადგილობრივებს გაუუმჯობესებათ ეკონომიკური მდგომარეობა.
„ინტერესი ინვესტორების მხრიდან მაღალია. თუმცა ველოდებით, რომ მათი დაინტერესება კონცეფციის გაცნობის შემდეგ უფრო გაიზრდება, როდესაც მათთვის უკვე კონკრეტული წინადადებების შეთავაზებას შევძლებთ. ინვესტიციებს რაც შეეხება, ვფიქრობ, სულ მცირე 750 მილიონი დოლარის ინვესტიციაზეა საუბარი. რაც რეგიონისთვის განვითარებისთვის სასიცოცხლო მნიშვნელობის შეიძლება გახდეს," განაცხადა საპარტნიორო ფონდის აღმასრულებელმა დირექტორმა ირაკლი კოვზანაძემ.
კოვზანაძის თანახმად, ეკონომიკის სამინისტროსთან ერთად ფონდის მიზანია, რომ 2030 წლისთვის წყალტუბო იქცეს სამედიცინო და სპა ცენტრის დედაქალაქად აღმოსავლეთ ევროპაში, რომელიც ადვილად გაუწევს ცენტრალური ევროპის ცნობილ კურორტებს კონკურენციას.
შეგახსენებთ, რომ სააქციო საზოგადოება საპარტნიორო ფონდი საქართველოს მთავრობის მიერ 2011 წელს დაარსდა. სახელმწიფო ფლობს ფონდის 100 პროცენტს. საპარტნიორო ფონდის აქტივები 5 მილიარდ ლარს აჭარბებს. ფონდი ფლობს „საქართველოს რკინიგზის", „საქართველოს ნავთობისა და გაზის კორპორაციის", „საქართველოს სახელმწიფო ელექტროსისტემის", ელექტროსისტემების კომერციული ოპერატორისა" და ნაწილობრივ, „თელასის" აქციებს. ფონდის ერთ-ერთი მთავარი ამოცანაა საინვესტიციო მიმართულებებთან ერთად, ამ სახელმწიფო სტრატეგიული აქციების სწორი კორპორატიული მართვა.
