ფინანსთა სამინისტროს საფინანსო-ანალიტიკურმა სამსახურმა პირველად საქართველოში ახალი მომსახურება - eCloud ტექნოლოგია დანერგა, რომლის პრეზენტაცია მიმდინარე წლის 4 დეკემბერს, სასტუმრო „ქორთიარდ მარიოტში" შედგა.
პრეზენტაცია ფინანსთა მინისტრის მოადგილემ ლაშა ხუციშვილმა გახსნა.
შეხვედრაზე ისაუბრეს eCloud-ის უპირატესობებსა და სარგებელზე. საფინანსო-ანალიტიკური სამსახურის eCloud პლატფორმა მომხმარებელს სთავაზობს მაღალი დონის, დუბლირებულ, აქტივ-აქტივ მონაცემთა ცენტრებში განთავსებულ სერვისს, აღჭურვილს 1000-ზე მეტი მაღალი წარმადობის სერვერითა და მონაცემთა შენახვა/დამუშავების სისტემებით, კვალიფიციური ადმინისტრატორებით, მოწყობილობებისა და პროგრამული უზრუნველყოფის მსოფლიოს წამყვანი მწარმოებლების მხარდაჭერით.
ახალი ტექნოლოგია ორგანიზაციებს საშუალებას მისცემს საკუთარი სერვერული ინფრასტრუქტურა განათავსონ საფინანსო-ანალიტიკური სამსახურის eCloud პლატფორმაზე და თავიდან აიცილონ მნიშვნელოვანი ხარჯები მატერიალური და ადამიანური რესურსების კუთხით, რაც დაკავშირებულია ამ ინფრასტრუქტურის შექმნასთან, შენახვასა და მართვასთან.
ღონისძიებას დაესწრნენ პრეზიდენტის ადმინისტრაციის, პარლამენტის, სამინისტროების, საჯარო სამართლის იურიდიული პირების და კერძო სექტორის საინფორმაციო-საკომუნიკაციო დანაყოფების, IT კომპანიების წარმომადგენლები.
