რუსეთიდან ფულადი გზავნილების მოცულობა ოთხ თვეში 10 მილიონი აშშ დოლარით შემცირდა.
იმის მიუხედავად, რომ ევროკავშირს ამ ეტაპზე არ მიუღია რუსეთისთვის SWIFT-ის მომსახურების შეჩერების გადაწყვეტილება, საქართველოში ფულადი გზავნილების მოცულობა ოთხ თვეში 10 მილიონი აშშ დოლარით არის შემცირებული. ექსპერტების განმარტებით, აღნიშნულს რუსეთის ეკონომიკაში შექმნილი მძიმე ვითარება და იქ ჩვენი თანამუმამულეების შემოსავლების კლება განაპირობებს.
2014 წლის ივლიში რუსეთიდან საქართველოში თანხის ჩარიცხვის მოცულობამ 72,636.7 ათასი აშშ დოლარი შეადგინა, ხოლო საქართველოდან გადარიცხული თანხის ოდენობამ - 5,977.7 ათასი აშშ დოლარი. აგვისტოში რუსეთიდან ჩამორიცხული თანხის ოდენობა 67,653.9 ათასი აშშ დოლარამდე შემცირდა, ხოლო სექტემბერში 66,772.0 ათასი აშშ დოლარამდე.
რაც შეეხება ოქტომბერს, ივლისთან მიმართებაში მნიშვნელოვანი კლება დაფიქსირდა და რუსეთიდან ჩამორიცხული თანის ოდენობა 62,226.1 ათასი აშშ დოლარამდე შემცირდა. ოქტომბერში გაიზარდა საქრთველოდან რუსეთში ფულის გადარიცხვის ოდენობა, რამაც 7,640.4 ათასი აშშ დოლარი შეადგინა.
ეროვნული ბანკის მონაცემებით, 2014 წლის ოქტომბრის თვეში, სწრაფი ფულადი გზავნილების საშუალებით საქართველოში ჩამორიცხული თანხის მოცულობა 123.9 მლნ აშშ დოლარს, ხოლო საქართველოდან გადარიცხული თანხის მოცულობა 17 მლნ აშშ დოლარს შეადგენს. გასული წლის ოქტომბრის თვესთან შედარებით აღნიშნული მაჩვენებლები შემდეგია: საქართველოში ჩამორიცხული თანხა წინა წლის ანალოგიურ პერიოდთან შედარებით 6.5 პროცენტით არის შემცირებული, ხოლო ქვეყნიდან განხორციელებულმა გადარიცხვებმა 14 პროცენტით მოიმატა. უდიდესი წილი, 50.2 პროცენტი, ტრადიციულად მოდის რუსეთის ფედერაციაზე და წინა წლის ანალოგიურ მაჩვენებელს 5 პროცენტული პუნქტით ჩამორჩება. 2013 წლის ოქტომბრის თვესთან მიმართებაში რუსეთის ფედერაციიდან ჩამორიცხულმა თანხებმა 15 პროცენტით იკლო. გადმორიცხული სახსრების მოცულობა წინა წლის შესაბამის პერიოდთან შედარებით 9 პროცენტით არის შემცირებული საბერძნეთიდან. საანგარიშო თვეში, მატება დაფიქსირდა იტალიიდან და აშშ-დან წარმოებული ტრანსფერების შემთხვევაში. ჩამორიცხული თანხები იტალიიდან წლიურად 2.5 პროცენტით, ხოლო აშშ-დან - 12.2 პროცენტით გაიზარდა. მნიშვნელოვანი კლება გაგრძელდა უკრაინის შემთხვევაში (40 პროცენტი). მკვეთრად იმატა ფულადმა გზავნილებმა თურქეთიდან. შემცირდა ესპანეთიდან და გაერთიანებული სამეფოდან ჩამორიცხული თანხები. 2013 წლის ოქტომბრის თვესთან მიმართებაში ფულადი ტრანსფერები ასევე შემცირებულია, საფრანგეთის, სომხეთის და პორტუგალიის შემთხვევაში. საერთოდ კლების ფონზე აღსანიშნავია ფულადი გადმორიცხვების მატება ისრაელიდან, გერმანიიდან, ყაზახეთიდან, აზერბაიჯანიდან, კანადიდან, არაბეთის გაერთიანებული საემიროებიდან, ბელგიიდან, კვიპროსიდან და ირლანდიიდან.