საქართველოში სტუმრად მყოფი ევროკავშირის დელეგაცია წეროვანში ლტოვილთა და განსახლების მინისტრს - კობა სუბელიანსა და დევნილ მოსახლეობას შეხვდა. ევროკავშირის გაფართოვებისა და სამეზობლო პოლიტიკის კომისარმა შტეფამ ფულემ დევნილებთან შეხვედრისას აღნიშნა, რომ ასეთ მცირე დროში დევნილებისთვის გაწეული დახმარებით და საცხოვრებელი პირობებით კმაყოფილია და დახმარებას გააგრძელებს.
"მოხარული ვარ, რომ ეს რეგიონი მოვინახულე. ასევე ვიყავი გორის რეგიონში, როცა სამხედრო მოქმედებები ახალი დასრულებული იყო. ხალხი მაშინ ურთულეს პირობებში ცხოვრობდა. მიხარია, რომ საშუალება გვეძლევა, დევნილებს დავეხმაროთ. საქართველომ შესძლო, საკმაოდ მცირე დროში აეშენებინა ეს ჩასახლებები. ნამდვილად კარგი საქმე გაკეთდა", _ განაცხადა ფულემ.
სუბელიანმა კი ჟურნალისტებთან საუბრისას აღნიშნა, რომ როცა დონორები წარმატებით შესრულებულ სამუშაოს ხედავენ, დახმარების სურვილი კიდევ უფრო მეტად უჩნდებათ.
"ჩვენ ასევე გვყავს აფხაზეთიდან დევნილი ოჯახები, რომლებიც ქირით ან ნათესავებთან ცხოვრობენ. შესაბამისად, დახმარება მათაც სჭირდებათ. დონორი ორგანიზაციები როცა საკუთარი თვალით ხედავენ, რა გაკეთდა დევნილი მოსახლეობისთვის, მოტივაცია უჩნდებათ, მეტი დაფინანსება გამოყონ. ისინი ხედავენ, რომ ჩვენ კაპიკ-კაპიკ ყველაფერს დევნილებისთვის ვაკეთებთ. ეს მათი ფულია, რომელიც კონკრეტული საქმისთვის იხარჯება", _ განაცხადა მან.
ევროკომისარი ფულე პასუხისმგებელია ევროკავშირის გაფართოვებაზე. ის ასევე წარმართავს ურთიერთობებსა და თანამშრომლობას აღმოსავლეთ პარტნიორობისა და ევროპული სამეზობლო პოლიტიკის განხორციელების პროცესში ჩართულ ქვეყნებთან. ევროკომისრის რანგში ეს შტეფან ფულეს პირველი ვიზიტია საქართველოში და ჩვენი ქვეყნის ევროკავშირთან დაახლეობის გზაზე მის მხარდაჭერას დიდი მნიშვნელობა აქვს.
