3 დეკემბერს, 11 საათზე, სასტუმრო „ჰოლიდეი ინ"-ში საქართველოს ეკონომისტთა ასოციაციის, საქართველოს ბიზნეს პალატისა და ჟურნალ „საქართველოს ეკონომიკის" ინიციატივით, შედგება თბილისის მესამე ეკონომიკური ფორუმი. ფორუმის თავისუფალი ტრიბუნის ფარგლებში გაიმართება დისკუსია თემაზე :
„პარალელური მმართველობის პრობლემები და ხელისუფლების ევროპიზაციის გამოწვევები ასოცირების ხელშეკრულების განსახორციელებლად"
დისკუსიის ფარგლებში განხილული იქნება საქართველოში არსებული სიტუაცია, ევროპასთან ასოცირების ხელშეკრულებით ნაკისრი ვალდებულებების შესრულებისათვის ხელისუფლების საქმიანობის შეფასება, ქვეყნის ევროპიზაციის პროცესში ხელისუფლების ევროპიზაციის ადგილი და როლი, სახელმწიფოს მართვის სფეროში ლეგიტიმური და არალეგიტიმური, პატრონ-კლიენტური გავლენებისა და მათი სოციალური და ეკონომიკური შედეგების, არაფორმალური ინსტიტუციონალიზაციის დემოკრატიის განვითარებაზე გავლენის ზომისა და მისი დაძლევის პერსპექტივების შესახებ, არაფორმალური ინსტიტუტების ავტორიტარიზმისა და მათ მიერ ფორმალური ინსტიტუტების „შიგნიდან" ძირის გამოთხრის საფრთხეები. დისკუსია გაჯერებული იქნება ცოცხალი მაგალითებით საქართველოს დღევანდელობიდან.
დისკუსიას წარმართავენ მეცნიერების, ბიზნესის, არასამთავრობო სექტორის, მასმედიის, პროფესიული ორგანიზაციების წარმომადგენლები.
დისკუსიაში მონაწილეობის მისაღებად მოწვეულები არიან ხელისუფლების, საერთაშორისო ორგანიზაციებისა და დიპლომატიური მისიების წარმომადგენლები.