საპარლამენტო უმრავლესობის ლიდერი დავით საგანელიძე პრეზიდენტს მიმართავს და მოუწოდებს, რომ ფარული მოსმენების შესახებ კანონთან დაკავშირებით, საკუთარი შენიშვნები საკანონმდებლო ორგანოს დროულად გადაუგზავნოს.
მისივე შეფასებით, თუ პარლამენტმა საკითხის გადაწყვეტა 1-ელ დეკემბრამდე ვერ შეძლო, სამართლებრივი ვაკუუმი შეიქმნება.
"მივმართავ პრეზიდენტს, რომ დოკუმენტი მოგვაწოდონ დროულად, რომ პარლამენტმა შეძლოს შესაბამისი რეაგირება. მოგეხსენებათ, 1-ელ დეკემბრამდეა ვადა, ამის შემდეგ შსს სტრუქტურებისთვის შეიქმნება სამართლებრივი ვაკუუმი. ამიტომ, დღის ბოლომდე იმუშავებს პარლამენტი, დაველოდებით პრეზიდენტისგან დოკუმენტს. თუ დღეს ვერ მოახერხებენ ქაღალდზე გადაიტანონ შენიშვნები და გამოაგზავნონ, ხვალისთვის გადავიტანთ სხდომას და ხვალაც დაველოდებით", - განუცხადა საგანელიძემ ჟურნალისტებს საკითხის კომენტირებისას.
პრეზიდენტს პარლამენტისთვის საკუთარი შენიშვნების წარსადგენად, კანონით, 10-დღიანი ვადა აქვს, თუმცა, პრეზიდენტის ადმინისტრაციის საპარლამენტო მდივანის გიორგი კვერენჩხილაძის განცხადებით, პრეზიდენტი პარლამენტს ფარული მოსმენების შესახებ კანონპროექტთან დაკავშირებით საკუთარ შენიშვნებს, შეძლებისდაგვარად შემჭიდროებულ ვადაში გადაუგზავნის.
