"ხალხის პარტიის" ლიდერის კობა დავითაშვილის განცხადებით, "ეროვნული საბჭოს" წარმომადგენლებისა და პოლიციას დაპირისპირებისას სამართალდამცავებმა ხუთი ოპოზიციონერი დააკავეს.
როგორც დავითაშვილმა "ჯი-ეიჩ-ენს" განუცხადა, დაკავებულია "ხალხის პარტიის წევრი ალეკო შალამბერიძე, "კონსერვატორებიდან" - ირაკლი იმნაძე და ტარიელ ბეკურიშვილი, ხოლო "სამართლიანი საქართველოდან" - გია კობიძე და ჯავახაძე.
"სტამბა "თბილისელებთან" მისულებს სტამბა დალუქული დაგვხვდა, რომელსაც პოლიციის გაძლიერებული შემადგენლობა იცავდა. ჩვენ საპატრულო პოლიციის უფროს გიორგი გეგეჭკორს ვკითხეთ, ვინ დალუქა სტამბა, რომელზეც მან გვიპასუხა, რომ არ იცის. ამ სტამბაშია ჩვენი კუთვნილი "კარდაკარის" მასალები,რომელიც გვჭირდება პრაიმერისთვის და საარჩევნო კამპანიისთვის", - განუცხადა "ჯი-ეიჩ-ენს" კობა დავითაშვილმა.
შეგახსენებთ, რომ პოლიციასა და ეროვნული საბჭოს წევრებს შორის შეხლა-შემოხლა მას შემდეგ დაიწყო, რაც "საბჭოს" ლიდერებმა სტამბა "თბილისელების" ტერიტორია დატოვეს და დიღმის მასივში, ბელიაშვილის ქუჩაზე გზა გადაკეტეს.
"ეროვნული საბჭოს" ლიდერები დალუქული სტამბის გახსნასა და იქ არსებული მათი კუთვნილი საარჩევნო დოკუმენტების დაბრუნებას ითხოვენ.
