ოკუპირებული აფხაზეთისა და რუსეთის პრეზიდენტებს შორის სოჭში ხელმოწერილი შეთანხმება იმაზე მიუთითებს, რომ რუსეთის ფედერაციას საქართველოს ნაწილის ანექსირება სურს.
ამის შესახებ ესტონეთის საგარეო საქმეთა მინისტრმა კეიტ პენტუს-როზიმანნუსმა სტოკჰოლმში შვედეთის საგარეო საქმეთა მინისტრთან შეხვედრაზე განაცხადა.
,,რუსეთის ეს ნაბიჯი არღვევს საქართველოს სუვერენიტეტს, ეწინააღმდეგება საერთაშორისო სამართლის ნორმებს და იმ ვალდებულებებს, რაც რუსეთმა ევროკავშირის წინაშე აიღო. ეს არის, აგრეთვე, ე. წ. სამშვიდობო გეგმის მეექვსე მუხლის დარღვევა." - აღნიშნა კეიტ პენტუს-როზიმანნუსმა.
მისი თქმით, სოჭში გაფორმებული ხელშეკრულება ჟენევის მოლაპარაკების პროცესსაც აფერხებს და ამით ხელს უწყობს დესტაბილიზაციას მთელ რეგიონში.
,,რუსეთის ქმედებები აფხაზეთში, მათ შორის, სასაზღვრო საფორტიფიკაციო მოწყობილობების დაყენება არალეგალურია. ჩვენ მოვუწოდებთ რუსეთს, 2008 წელს დადებული მოლაპარაკებით დაკისრებული ყველა ვალდებულება შეასრულოს, ასევე, გაიყვანოს ჯარი იმ პოზიციაზე, რა პოზიციაზეც 2008 წლის ომამდე იყო. ამასთან, აუცილებელი და საჭიროა, ევროკავშირის მისიის დამკვირვებლებს აფხაზეთის რეგიონზეც მიუწვდეთ ხელი." - განცხადა ესტონეთის საგარეო საქმეთა მინისტრმა.
