აფხაზეთის რეგიონში შექმნილი ვითარებიდან გამომდინარე, საჭიროა ჩვენი დიპლომატების სრული მობილიზება, რომ საქართველოს მხარდამჭერი პოზიციები გაჟღერდეს საერთაშორისო ასპარეზზე, - ამის შესახებ, "თავისუფალი დემოკრატების" წევრმა ირაკლი ჩიქოვანმა ჟურნალისტებთან შეხვედრისას განაცხადა.
მისი თქმით, ამ ვითარებაში ერთადერთი ეფექტური ბერკეტი, რაც საქართველოს რუსეთის წინააღმდეგ გააჩნია, არის საერთაშორისო საზოგადოების მაქსიმალური მობილიზება.
"რუსეთმა გადადგა ნაბიჯი, რისი საფრთხეც არსებობდა. დღეს გაგვაქვს რეალობა, როდესაც რუსეთს აქვს განუსაზღვრელი ძალაუფლება საქართველოს ოკუპირებულ ტერიტორიებზე. ამ ვითარებაში ერთადერთი ეფექტური საშუალება, რაც გვაქვს არის საერთაშორისო საზოგადოების მაქსიმალური მობილიზება.
მიზანშეწონილად მიმაჩნია, იქნას მოწვეული გაეროს უშიშროების საბჭოს სხდომა. ასევე, საჭიროა ჩვენი დიპლომატების სრული მობილიზება, რომ საქართველოს მხარდამჭერი პოზიციები გაჟღერდეს საერთაშორისო ასპარეზზე", - განაცხადა ჩიქოვანმა.
"თავისუფალი დემოკრატების" წევრი მიიჩნევს, რომ რუსეთის მიერ აფხაზეთის დე-ფაქტო რესპუბლიკასთან ე.წ. მოკავშირეობის და სტრატეგიული პარტნირობის შესახებ შეთანხმების გაფორმებამ, აბაშიძე-კარასინის შეხვედრის ფორმატის გაგრძელება ეჭვქვეშ დააყენა.
"საქართველოს წლების განმავლობაში არ დაუკლია ძალისხმევა რომ მეზობელთან ურთიერთობა დაგველაგებინა, ცხადია, ამის დადასტურებაა ჟენევის ფორმატი, ეს არის ფორმატის, სადაც უნდა წყდებოდეს მნიშვნელოვანი საკითხები. იმ ნაბიჯმა, რაც რუსეთმა ამ ე.წ. ხელშეკრულების ხელმოწერით გადადგა, ვფიქრობ, აბაშიძე-კარასინის ფორმატის გაგრძელება ეჭვქვეშ დააყენა. აუცილებლად მიმაჩნია, შეიკრიბოს საქართველოს ეროვნული უშიშროების საბჭოს სხდომა, რომელზეც რუსეთის ამ ქმედების საწინააღმდეგო ნაბიჯები იქნება განხილული", - განაცხადა ჩიქოვანი.
