,,ახალი მემარჯვენეები" ოკუპირებულ აფხაზეთსა და რუსეთის ფედერაციას შორის სამოკავშირეო ხელშეკრულება გაფორმებას ანექსიის მცდელობად აფასებენ. როგორც პარტიის მიერ გავრცელებულ განცხადებაშია აღნიშნული 24 ნოემბერს სოჭში რუსეთის პრეზიდენტისა და აფხაზეთის ფაქტობრივი ხელისუფლების წარმომადგენლის მიერ ხელმოწერილი მოკავშირეობისა და ინტეგრაციის შესახებ ხელშეკრულება ქართული სახელმწიფოსათვის, მისი სუვერენიტეტისა და ტერიტორიული მთლიანობისათვის კიდევ ერთ ძალიან რთულ გამოწვევას წარმოადგენს. ერთის მხრივ, ეს არის გამიზნულად აფხაზეთის ფაქტობრივი ანექსიისაკენ გადადგმული ნაბიჯი და მეორეს მხრივ, ცხადი ნიშანი იმისა, რომ პროცესი ამით არ დასრულდება და მსგავსი მოვლენების წყებას რუსეთის მხრიდან აგრესიული ქმედებების სახით კვლავ უნდა ველოდოთ.
პარტიის მიერ გავრცელებული განცხადების თანახმად, მოცემულ ისტორიულ მომენტში უმნიშვნელოვანესია, რომ საქართველოს ხელისუფლებამ დაუყოვნებლივ დაიწყოს აქტიური მოქმედება ქვეყნის გარეთ საერთაშორისო აზრის მობილიზაციისა და ქვეყნის შიგნით საზოგადოების კონსოლიდაციის მიზნით. გავაცნობიეროთ რომ სუვერენიტეტის დათმობის გარეშე რუსეთთან ურთიერთობის ნორმალიზება შეუძლებელია და დროულად გავითავისუფლოთ თავი ამ ილუზიისაგან.
,,ახალი მემარჯვენეებს" შექმნილ ვითარებაში გადაუდებელ აუცილებლობად მიაჩნია:
1. უმაღლესი თანამდებობის პირების მხრიდან გაკეთდეს საგანგებო განცხადებები და მიმართვები საერთაშორისო საზოგადოებისადმი. საკითხის აქტუალიზაციისათვის მოთხოვნილ იქნას საგანგებო ფორმატები და ორმხრივი შეხვედრები უმაღლეს დონეზე;
2.გადაიხედოს ქართულ-რუსული ურთიერთობის არსებული სპეციფიური ფორმატი და დაუყოვნებლივ გაცხადდეს ქართული მხარის პოზიცია აფხაზეთი-სომხეთის დამაკავშირებელი სარკინიგზო ხაზის აღდგენის განზრახვასა და და სხვა სტრატიგიული მნიშვნელობის მქონე პროექტებთან მიმართებაში.
,,ახალი მემარჯვენეების" ცნობით, ქართველმა ხალხმა აფხაზურ საზოგადოებასაც უნდა დაანახოს, რომ ჩვენ არა მხოლოდ საქართველოს დარღვეული ტერიტორიული მთლიანობა გვადარდებს, არამედ ძალიან გვაღელვებს და გვტკივა თავად აფხაზების, აფხაზური ეთნოსის ბედი, რომელსაც რუსული პოლიტიკის წყალობით სრული ასიმილაცია და გაქრობა ემუქრება.
პარტია მზადაა აქტიურად ჩავერთოთ საქართველოს პრეზიდენტის მიერ ინიცირებულ კონსულტაციებში, რათა ამ უმნიშვნელოვანეს საკითხებზე ჩამოვაყალიბოთ ქართული საზოგადოების ერთიანი ხედვა და მტკიცე სახელმწიფოებრივი პოზიცია.
