დღეს, 21 ნოემბერს ოკუპირებული აფხაზეთისა და ცხინვალის რეგიონის რუსეთის მიერ ანექსირების მცდელობის შესახე კანონპროექტზე იმსჯელებენ პარლამენტში.
რეზოლუცია "ერთიანი ნაციონალური მოძრაობისა" და პარლამენტის უმცირესობაში შემავალი სხვა ფრაქციების მიერ არის წარდგენილი და მას ევროინტეგრაცის კომიტეტში განიხილავენ.
რეზოლუციის პროექტის მიხედვით, რუსეთის მიერ აგრესიის გაგრძელების შემთხვევაში, უნდა მოხდეს საერთაშორისო სანქციებისა და სხვადასხვა შეზღუდვების დაწესება.
,,რეზოლუციის იმ ვარიანტში, რომელიც ,,ნაციონალურმა მოძრაობამ" შევთავაზეთ პარლამენტს, არის ჩამოყალიბებული ძალიან კონკრეტული ნაბიჯები, რაც უნდა გადადგას მთავრობამ, რომ წინ აღუდგეს ამ პროცესს. პირველ რიგში საუბარი არის საერთაშორისო სამართლებრივი მექანიზმების ამოქმედებაზე. უახლოეს მომავალში შესაძლებელია შემოღებული იქნეს კიდევ ახალი სანქციები რუსეთის წინააღმდეგ უკრაინის მოვლენების გამო და აუცილებელია, რომ საქართველოს მთავრობამ იაქტიუროს, რათა ამ ახალი სანქციების მიზეზებში მაინც მოხდეს საქართველოს პრობლემატიკა", - განაცხადა ,,ნაცმოძრაობის" წევრმა გიორგი კანდელაკმა.
განხილვას დაესწრებიან ,, თავისუფალი დმეოკრატებიც". როგორც პარტიის ერთ-ერთი წევრი ვიქტორ დოლიძე ჟურნალისტებთან განმარტავს დოკუმენტს გაეცნობიან და მხოლოდ ამის შემდეგ შეაფასებენ მის მნიშვნელობას.
"მოვუსმენთ გავიგებთ რაშია საქმე, რა მოსაზრებები აქვთ რას ემსახურება ეს ყველაფერი და დასკვნებს გამოვიტანთ", - აცხადებს ვიქტორ დოლიძე.