ფრაქცია "თავისუფალი დემოკრატები" ფარულ მოსმენებთან დაკავშირებით, მხარს ვახტანგ ხმალაძის ვერსიას დაუჭერენ, - ამის შესახებ, პარლამენტის იურიდიულ საკითხთა კომიტეტის თავმჯდომარის მოადგილე შალვა შავგულიძემ ჟურნალისტებთან საუბრისას განაცხადა.
შავგულიძე იმედოვნებს, რომ პრეზიდენტი მათ პოზიციას გაიზიარებს და უმრავლესობის მიერ წარდგენილ კანონპროექტს ვეტოს დაადებს.
" ჩვენ, "თავისუფალი დემოკრატები" მხარს ვახტანგ ხმალაძის ვერსიას დავუჭერთ, ვინაიდან, ამ ვარიანტით გასაღები აღარ რჩება შინაგან საქმეთა სამინისტროში. მიმაჩნია, რომ პრეზიდენტი იქნება თავის პოზიციაში თანმიმდევრული და თუ მან დაუშვებლად მიიჩნია კიდევ სამი თვით შსს-ში გასაღების დარჩენა და მუშაობის ვადა შეგვიმცირა ერთ თვემდე, სამუდამოდ შინაგან საქმეთა სამინისტრიში მის დაჩენას მხარს არ დაუჭერს", - განაცხადა შავგულიძემ.
პარლამენტის იურიდიულ საკითხთა კომიტეტის თავმჯდომარე ვახტანგ ხმალაძის პროექტის მიხედვით, პერსონალურ მონაცემებზე წვდომა კომუნიკაციების ეროვნულ კომისიას ექნება.
რაც შეეხება, უმრავლესობის წევრების, ეკა ბესელიას, გედევან ფოფხაძის და ირაკლი სესიაშვილის შეთავაზებულ კანონპროექტს, ის ითვალისწინებს, რომ პერსონალურ ინფორმაციაზე წვდომა პერსონალური მონაცემების დაცვის ინსპექტორს და შსს-ს ექნება, თუმცა მოსმენის ნებართვას სასამართლო გასცემს
