19 ნოემბერს საქართველოს საგარეო საქმეთა მინისტრმა, თამარ ბერუჩაშვილმა და გაერთიანებული სამეფოს ევროპის საქმეთა სახელმწიფო მინისტრმა, დევიდ ლიდინგტონმა ლონდონში დიდი ბრიტანეთსა და საქართველოს შორის ორმხრივი დიალოგის საინაუგურაციო სხდომა გამართეს.

საინაუგურაციო სხდომის გახსნაზე მხარეებმა ხაზი გაუსვეს ორ ქვეყანას შორის არსებულ ურთიერთობას და იმ ახალ შესაძლებლობებს, რასაც ორმხრივი ყოველწლიური დიალოგის დაწყება იძლევა. პლენარულ სხდომაზე საუბარი შეეხო ორი ქვეყნის თანამშრომლობის პრიორიტეტულ საკითხებს.
განიხილეს ბრიუსელში საქართველოს ასოცირების საბჭოს სხდომის შედეგები. დევიდ ლიდინგტონმა ხაზგასმით დაადასტურა საქართველოს ევროპასა და ნატოში ინტეგრაციის მიმართ გაერთიანებული სამეფოს მთავრობის მხარდაჭერა.

ორმხრივი დიალოგის პირველ სესიაზე საუბარი ასევე შეეხო რეგიონსა და საქართველოში ბოლო დროს განვითარებულ მოვლენებს.

დიალოგის პირველი სხდომის გახსნის შემდგომ შეხვედრები თემატური ჯგუფების მიხედვით გაგრძელდა. განსაკუთრებული ყურადღება დაეთმო სფეროებს, სადაც გაერთიანებულ სამეფოსა და საქართველოს შეუძლიათ უფრო მჭიდროდ ითანამშრომლონ და ერთმანეთს ცოდნა და გამოცდილება გაუზიარონ.
სამი სამუშაო სესიის ფარგლებში საუბარი წარიმართა საერთაშორისო, რეგიონალურ და ორმხრივი ურთიერთობის საკითხებზე; ეროვნული უსაფრთხოებისა და თავდაცვის სფეროში თანამშრომლობისა და ეკონომიკურ, სავაჭრო და ენერგეტიკულ საკითხებზე.

საქართველოს დელეგაციის შემადგენლობაში შედიოდნენ: ეკონომიკისა და მდგრადი განვითარების მინისტრის მოადგილე მიხეილ ჯანელიძე, ენერგეტიკის მინისტრის მოადგილე მარიამ ვალიშვილი, რუსეთის ფედერაციასთან ურთიერთობის საკითხებში პრემიერ-მინისტრის სპეციალური წარმომადგენელი ზურაბ აბაშიძე, ადამიანის უფლებათა საკითხებში საგანგებო დავალებათა ელჩი ირაკლი გივიაშვილი, საგარეო საქმეთა სამინისტროს ევროპულ საქმეთა დეპარტამენტის, შინაგან საქმეთა სამინისტროს კონტრტერორისტული ცენტრის, თავდაცვის სამინისტროს თავდაცვის პოლიტიკისა და დაგეგმვის დეპარტამენტის, მთავრობის კანცელარიის პოლიტიკის ანალიზის, სტრატეგიული დაგეგმვისა და კოორდინაციის დეპარტამენტის, სახელმწიფო უსაფრთხოებისა და კრიზისების მართვის საბჭოს აპარატის წარმომადგენლები.

საქართველოში გაერთიანებული სამეფოს უმაღლესი წარმომადგენლის ოლივერ უორდოპის ხსოვნის პატივსაცემად, რომლის 150 წლის იუბილე წელს როგორც საქართველოში, ისე გაერთიანებულ სამეფოში აღინიშნა, გადაწყდა, რომ დიალოგს „უორდროპის დიალოგი". ეწოდოს. ორ ქვეყანას შორის ყოველწლიური დიალოგის დაწყების აღსანიშნავად გაერთიანებული სამეფოს ევროპლ საქმეთა მინისტრმა საქართველოს საგარეო უწყების ხელმძღვანელს ესტაფეტის სიმბოლირი ნიშანი გადასცა.

„მოხარული ვარ, რომ საგარეო საქმეთა მინისტრ თამარ ბერუჩაშვილთან ერთად, დღეს გაერთიანებულ სამეფოსა და საქართველოს შორის დიალოგი დაიწყო. ვიმედოვნებ, რომ ეს შეხვედრები კიდევ უფრო განამტკიცებს გაერთიანებულ სამეფოსა და საქართველოს შორის უკვე არსებულ მჭიდრო ურთიერთობებს და ამასთანავე, ევრო-ატლანტიკურ სივრცესთან კავშირებს განავრცობს" - განაცხადა დევიდ ლიდინგტონმა.

საქართველოს საგარეო საქმეთა მინისტრის შეფასებით ირმხრივი დიალოგი თვისობრივად ახალ დონეზე აიყვანს ირი ქვეყნის ურთიერთობას, ხელს შეუწყობს ქვეყნებს შორის ინსტიტუციური დიალოგის განვითარებას და თანამშრომლობის ახალი სფეროების წარმოჩენას. როგორც შეხევდრაზე თამარ ბერუჩაშვილმა აღნიშნა, ევროპული და ევრო-ატლანტიკური ინტეგრაციის გზაზე საქართველოს ისტორიაში ახალი ფურცელი იწყება, რაც ქვეყანას თავისუფალი სახელმწიფოების ევროპულ ოჯახში შეიყვანს.
"ამის გათვალისწინებით ჩვენ ველით რომ წლიური დიალოგი იქნება ის ფორმატი რომლის ფარგლებშიც განხილული იქნება საქართველოს ევროპული და ევროატლანტიკური ინტეგრაციის საკითხები.
ჩვენ ვაფასებთ გაერთიანებული სამეფოს უწყვეტ მხარდაჭერას საქართველოს ტერიტორიული მთლიანობისა და სუვერენიტეტისადმი, ოკუპირებული აფხაზეთისა და ცხინვალის რეგიონების არ აღიარების პოლიტიკისადმი განსაკუთრებით რუსეთის ფედერაციის აგრესიული პოლიტიკის ფონზე"- განაცხადა საქართველოს საგრეო საქმეთა მინისტრმა.

დიალოგის დაწყების ინიციატივა გაერთიანებული სამეფოს ყოფილმა საგარეო საქმეთა მინისტრმა, უილიამ ჰეიგმა 2014 წლის მაისში, საქართველოში ვიზიტისას გააჟღერა. დიალოგის მიზანი საქართველოსა და გაერთიანებული სამეფოს შორის არსებული მტკიცე ურთიერთობების დაფიქსირება, საერთო ინტერესის საკითხების განხილვა და თანამშრომლობის ახალი სფეროების გამოვლენაა.