ე.წ. გასაღების საკითხზე კიდევ ერთი წინადადების მიხედვით, რომელიც პარლამენტის იურიდიულ საკითხთა კომიტეტის თავმჯდომარე ვახტანგ ხმალაძეს ეკუთვნის, პერსონალურ მონაცემებზე წვდომა კომუნიკაციების ეროვნულ კომისიას ექნება.
კანონის პროექტი პარლამენტში გუშინ შევიდა. ინიციატივა ითვალისწინებს, რომ ფარული მოსმენების ე.წ. "გასაღები" კომუნიკაციების მარეგულირებელი კომისიის ხელში გადავა, თუმცა აღნიშნული პროექტის მიხედვით მეორე "გასაღების" საკითხი კვლავ ღიად რჩება.
ინიციატივას ახალგაზრდა იურისტთა ასოციაციიაში იწონებენ.
არასამთავრობო ორგანიზაციები, რომლებიც პროცესში აქტიურად არიან ჩართულიი, ე.წ. "გასაღები"- ს შინაგან საქმეთა სამინისტროს ხელში დარჩენას ეწინააღმდეგებიან. მათი თქმით, ევროპელი ექსპერტების რეკომენდაციაში, სადაც ორგასაღებიანი მექანიზმის ამოქმედებაზე იყო საუბარი,აღნიშნულია, რომ პერსონალურ მონაცემებზე სამართალდამცავ ორგანოებს წვდომა არ უნდა ჰქონდეთ.
არასამთავრობოების შეთავაზება ითვალისწინებს ე.წ. ორგასაღებიანი სისტემის ამოქმედებას, რომლის მიხედვითაც, ერთი გასაღები სასამართლოს, ხოლო მეორე ელექტრონულ კომპანიებს ექნებათ.
სამუშაო ჯგუფის შეხვედრა 15:00 საათზე გაიმართბა. სხდომაზე კანონმდებლები რამდენიმე პროექტს განიხილავენ.
შეგახსენებთ, პერსონალური მონაცემების დაცვის შესახებ კანონპროექტის პარლამენტში წარდგენის ვადა ხვალ იწურება.
