საქართველოს მთავრობამ კომპანია შპს უტას ვალის სანაცვლოდ სახელმწიფო ქონება გადასცა.
საქართველოს მთავრობის 7 ნოემბრის №2029 განკარგულებით შპს „უტას" (ს/კ 203835957) საკუთრებაში გადაეცა სახელმწიფო საკუთრებაში არსებული ქ. თბილისში, რ. თაბუკაშვილის (ყოფ. ძნელაძე) ქუჩა №27/1-ში მდებარე უძრავი ქონება საერთო ფართით 1612,74 კვ.მ. განკარგულებაში აღნიშნულია, რომ ქონება გაიცემა შპს „უტას" მიერ სახელმწიფოსგან 1 922 165 (ერთი მილიონ ცხრაას ოცდაორი ათას ას სამოცდახუთი) ლარის მოთხოვნის უფლების გადაცემის სანაცვლოდ. განკარგულების საფუძველი გახდა აუდიტის დასკვნა, რომლის მიხედვითაც სახელმწიფოს ვალი შპს „უტას" მიმართ წარმოადგენდა 1 922 165 ლარს.
განკარგულებაში მთავრობის მიერ გაკეთდა დათქმა, რომ ხელშეკრულების გაფორმებიდან ორი წლის ვადაში შპს „უტას" მოუწევს ბიუჯეტში დამატებით 681 835 (ექვსას ოთხმოცდაერთი ათას რვაას ოცდათხუთმეტი) ლარის გადახდა.
განკარგულების მიხედვით, კომპანიის მიერ თაბუკაშვილის ქუჩაზე მისთვის გადაცემული ფართის 1კვ/მ-ში გადახდილი თანხა ორი წლის შემდგომ იქნება 1922,59 ლარი (1089 აშშ დოლარი).
აღნიშნული თანხის გადახდამდე, ხელშეკრულების გაფორმებიდან სამი თვის ვადაში შპს „უტა" ვალდებულია სახელმწიფოს სასარგებლოდ იპოთეკით დატვირთოს ქ. თბილისში, რუსთაველის გამზირი №19-ში და ქ. თბილისი, ვასო აბაშიძის ქ. №5 - ში მის საკუთრებაში არსებული ქონება.
უნდა აღინიშნოს, რომ სამეწარმეო რეესტრის ამონაწერის მიხედვით, რომელშიც ბოლო ცვლილებები შესულია 2012 წლის 5 დეკმბერს, შპს „უტას" იურიდიულ მისამართად მითითებულია თაბუკაშვილის 27-ში არსებული შენობა. კომპანია, რომელიც რეგისტრირებულია 1996 წელს, ოფიციალურად წლის მფლობელები არიან: ბაკურ კიღურაძე - 84%, ქეთევან კიღურაძე- გოგილაშვილი - 4%, ლიანა მაღლაკელიძე - 4%, თამაზ გოგილაშვილი 4%, გიორგი გოგილაშვილი 4%.
შპს „უტა"-ს და სახელმწიფოს შორის დავა დიდი ხანია მიმდინარეობს, საქმე არაერთხელ განიხილა სასამართლომ. კომპანიის დამფუძნებელი წინა ხელისუფლების დროს დაპატიმრებული იყო და მას მინიჭებული აქვს პოლიტპატიმრის სტატუსი. ცნობილია, რომ საინვესტიციო კომპანია ,,ნიბა ინვესტის", რომელიც „უტას" შვილობილი კომპანიაა, დამფუძნებლები კომპანია „უტა" (50 %) და ნიკო ლეკიშვილი (50%) არიან.
