რუსეთის თავდაცვის მინისტრი ანატოლი სერდიუკოვი აცხადებს, რომ საქართველოს მხრიდან ე. წ. სამხრეთ ოსეთის მიმართულებით ძალის გამოყენების ალბათობის საფრთხე ჯერ კიდევ შენარჩუნებულია.
"სამხრეთ ოსეთის საზღვართან მდგომარეობა რთულია. ჯერ კიდევ შენარჩუნებულია საფრთხე საქართველოს მხრიდან სამხრეთ ოსეთის მიმართ ძალის გამოყენებისა", _ ეს განცხადება სერდიუკოვმა ოს სეპარატისტთა ე. წ. თავდაცვის მინისტრთან იური ტანაევთან დღეს გამართული შეხვედრისას გააკეთა.
აღნიშნული შეხვედრის დროს რუსმა ოკუპანტებმა და ოსმა სეპარატისტებმა ხელი მოაწერეს შეთანხმებას "სამხრეთ ოსეთის ტერიტორიაზე გაერთიანებული რუსული სამხედრო ბაზის შესახებ".
"დღეს ხელს მოვაწერთ შეთანხმებას, რომელიც, იმედი მაქვს, ეფექტურად გაუწევს წინააღმდეგობას ნებისმიერ გამოწვევას და უსაფრთხოების საფრთხეებს", _ განაცხადა სერდიუკოვმა.
რუსული მედიის ინფორმაციით, აღნიშნული დოკუმენტით რეგულირდება რუსი ჯარისკაცების სამართლებრივი ყოფნა ე. წ. სამხრეთ ოსეთის ტერიტორიაზე.
