საჯარო რეესტრის ეროვნული სააგენტოს ოფიციალური მონაცემებით, 2014 წლის ოქტომბრში ქვეყანაში რეგისტრირებული ბიზნეს სუბიექტების რაოდენობამ 4 329 ერთეული შეადგინა, რომელთა შორის 97.1% სამეწარმეო სუბიექტია (ინდივიდუალური მეწარმე, სოლიდარული პასუხისმგებლობის
საზოგადოება, შეზღუდული პასუხისმგებლობის საზოგადოება, სააქციო საზოგადოება, კომანდიტური საზოგადოება, კოოპერატივი, უცხოური სამეწარმეო იურიდიული პირის ფილიალი), ხოლო 2.9% - არასამეწარმეო სუბიექტი (არასამეწარმეო იურიდიული პირი, უცხოური არასამეწარმეო იურიდიული პირის ფილიალი, საჯარო სამართლის იურიდიული პირი). ამავე თვეში ბიზნესის რეგისტრაციის თვის ინდექსი (დეკემბერი 2010=100) 0.989 დონეზე დაფიქსირდა.
ოქტომბრში ზრდა დაფიქსირდა როგორც წინა თვესთან (3.1%-ით), ისე წინა წლის იმავე თვესთან (7.8%-ით) შედარებით.
2014 წლის ოქტომბრში წინა თვესთან შედარებით სამეწარმეო სუბიექტების რაოდენობა 2.7%-ით, ხოლო არასამეწარმეო სუბიექტების რაოდენობა 19.2%-ით გაიზარდა. განსხვავებული ტენდენცია დაფიქსირდა წინა წლის იმავე თვესთან შედარებით: სამეწარმეო სუბიექტების რაოდენობის ზრდა 8.3%-ით
და არასამეწარმეო სუბიექტების რაოდენობის კლება 7.5%-ით. ამავე თვეში ბიზნესის რეგისტრაციის თვის ინდექსი (დეკემბერი 2010=100) სამეწარმეო და არასამეწარმეო სუბიექტების მიხედვით შესაბამისად 0.989 და 0.976 დონეებზე დაფიქსირდა.
ოქტომბრში ბიზნეს სუბიექტთა უმეტესობა დარეგისტრირდა ინდივიდუალური მეწარმის (2 486 ერთეული, ანუ რეგისტრირებულ ბიზნეს სუბიექტთა 57.4%) და შეზღუდული პასუხისმგებლობის საზოგადოების (1 625 ერთეული, ანუ რეგისტრირებულ ბიზნეს სუბიექტთა 37.5%) სახით. როგორც ჩანს, ბიზნეს სუბიექტთა 94.9% მხოლოდ აღნიშნულ სამართლებრივ სტატუსებს ანიჭებს უპირატესობას. ამავე თვეში ქვეყანაში დარეგისტრირდა: 119 არასამეწარმეო იურიდიული პირი, 75 კოოპერატივი, 17 უცხოური სამეწარმეო იურიდიული პირის ფილიალი, 3 უცხოური არასამეწარმეო იურიდიული პირის ფილიალი და 2-2 სააქციო საზოგადოება და საჯარო სამართლის იურიდიული პირი.