„თიბისი ბანკმა" სამშაბათს, მიმდინარე წლის სამი კვარტალის კონსოლიდირებული შედეგები გამოაცხადა და განაცხადა, რომ საცალო დეპოზიტების მიხედვით ბაზრის ლიდერია.
შედეგები არაუდიტირებულია და საერთაშორისო საფინანსო ანგარიშგების სტანდარების მიხედვით (IFRS) არის მომზადებული.
ბანკის საოპერაციო მოგება ამ წლის მესამე კვარტალში, წლიურ გამოსახუელბაში 19.8%-ით, 114.3 მლნ ლარამდე გაიზარდა, ხოლო იანვარ-სექტემბერში ამ ციფრმა 326.0 მლნ ლარი შეადგინა (17.6%-იანი წლიური ზრდა).
მესამე კვარტალის წმინდა მოგება წლიურად 33.8%-ით, 45.6 მლნ ლარამდე გაიზარდა. 9 თვის წმინდა მოგება კი 118.4 მლნ ლარი იყო ( 33.3%-იანი წლიური ზრდა).
ბანკის მთლიანმა აქტივებმა 30 სექტემბრისთვის 5,044 მლრდ ლარი შეადგინა, რაც 25.6%-იანი წლიური და 5.1%-იანი კვარტალური ზრდაა.
მთლიანი სასესხო პორტფელი საანგარიშო პერიოდისთვის წლიურად 23.4%-ით, კვარტალურად 5%-ით გაიზარდა და 3,230 მლრდ ლარი შეადგინა. მათ შორის საცალო სასესხო პორტფელის წლიურმა ზრდამ 33.2% შეადგინა, კვარტალურმა 7.7% და მოცულობამ კი 30 სექტემბერისთვის 1,446 მლრდ ლარი შეადგინა. მცირე და საშუალო ბიზნესის დაკრედიტების პორტფელის მოცულობა 30 სექტემბრისთვის 460.7 მლნ ლარია, რაც წინა წლის 30 სექტემბერთან შედარებით 35.1%-ით არის გაზრდილი.
კლიენტთა დეპოზიტებმა შეადგინა 3,003 მლრდ ლარი, რაც 14,9%-იანი წლიური ზრდაა.
ბანკმა განაცხადა, რომ საცალო დეპოზიტების ბაზრის წილი მისთვის სტაბილურად 33.3%-ია და ამ მხრივ პირველ ადგილზეა ბაზარზე.
