ექსპერტ მამუკა არეშიძის შეფასებით, ყირგიზეთში მიმდინარე პროცესები გარე ძალების ჩარევის გარეშე არ მოხდებოდა. "ყირგიზეთში მიმდინარე პროცესების არის იმის რეზულტატი, რომ რევოლუციური გზით მოსული ხელისუფლება თავის წინამორბედის ტოლფასი უცებ გახდა. ისინი ისევე იქცევიან, როგორც წინა მთავრობა. ხალხი ამ ხელისუფლებას იმის გამო აკრიტიკებდა, რის გამოც წინა მთავრობას მოუწყეს რევოლუცია, კერძოდ კი კორუფციის, ადამიანის უფლების და სამუშაო ადგილების შექმნის კუთხით ძალიან მძიმე მდგომარეობა იყო. ასევე რთული მდგომარეობა იყო ენერგეტიკის თვალსაზრისითაც. ყოველივე ამან კი ხალხის ახალი განწყობის ჩამოყალიბება განაპირობა", - განაცხადა ჯი-ეიჩ-ენთან" საუბრისას არეშიძემ. მისვე შეფასებით, მიუხედავად ყველაფრისა, უცხო ძალების ჩარევის გარეშე ეს სიტუაცია ვერ განმეორდებოდა. "ვფიქრობ, რომ ამ პროცესებში ვიღაცა არის ჩარეული. მაგრამ რა ძალებია ამაზე ამ ეტაპზე ინფორმაციას არ ვფლობ. შემიძლია ვთქვა, რომ ამ ხელისუფლების ზოგიერთი ნაბიჯიმა, რომელიც მათი აზრით ამერიკასა და რუსეთს შორის მომგებიანად თამაშობდა, ეტყობა მთლად ვერ გაამართლა და უფრო წამგებიანი აღმოჩნდა", - აღნიშნა არეშიძემ და აქვე დასძინა, რომ დღევანდელ პროცესებში მონაწილე ოპოზიციის ნაწილი ის ხალხია, რომელიც რევოლუციაშიც აქტიურად მონაწილებდა. ყირგიზეთის ხელისუფლების წინააღმდეგ საპროტესტო გამოსვლები გუშინ დაიწყო, რომელიც შემდეგ დაპირისპირებაში გადაიზარდა. გავრცელებული ინფორმაციით მილიციასთან შეტაკების დროს 6 ადამიანი დაიღუპა და 100-ზე მეტი დაიჭრა. აქციის მონაწილეებმა ქვეყნის პირველი ვიცე-პრემიერი მძევლად აიყვანეს და სახელმწიფო ტელევიზიის შენობა შტურმით აიღეს. დედაქალაქის ქუჩებში შეტაკებები გრძელდება.