საქართველოს და აშშ-ის პრეზიდენტებს, მიხეილ სააკაშვილსა და ბარაკ ობამას შორის სატელეფონო საუბარი გაიმართა.
საქართველოს პირველი პირის ადმინისტრაციის ინფორმაციით, ობამამ სააკაშვილს ავღანეთის საერთაშორისო ოპერაციებში შეტანილი წვლილისთვის მადლობა გადაუხადა.
ამასთან, პრეზიდენტებმა მომავალი ბირთვული უსაფრთხოების სამიტის თემატიკა, აშშ-საქართველოს შორის არსებული სტრატეგიულ თანამშრომლობა, რეგიონალურ უსაფრთხოების საკითხები და საქართველოში მიმდინარე რეფორმები განიხილეს.
"პრეზიდენტმა სააკაშვილმა მადლობა გადაუხადა პრეზიდენტ ობამას ბირთვული უსაფრთხოების სამიტზე მიწვევისათვის. ორივე პრეზიდენტი იზიარებს მოსაზრებას, რომ უსაფრთხო მსოფლიოსათვის მნიშვნელოვანია საერთაშორისო თანამშრომლობა და მტკიცე ძალისხმევა ატომური იარაღის გავრცელების წინააღმდეგ. თავის მხრივ კი, პრეზიდენტმა ობამამ მადლობა გადაუხადა პრეზიდენტ სააკაშვილს საქართველოს მონაწილეობისათვის ავღანეთში მიმდინარე საერთაშორისო ოპერაციაში. მან ხაზი გაუსვა საქართველოს კონტრიბუციის მნიშვენლობას კოალიციის წარმატებისა და ავღანეთში მშვიდობისა და სტაბილურობის დამყარების საქმეში", - ნათქვამია საქართველოს პრეზიდენტის ოფიციალურ ვებ-გვერდზე გავრცელებულ განცხადებაში,
მასში ასევე აღნიშნულია, რომ პრეზიდენტებმა რეგიონალური უსაფრთხოების საკითხებიც განიხილეს, რის კონტექსტშიც ბარაკ ობამამ კიდევ ერთხელ გამოხატა სრული მხარდაჭერა საქართველოს სუვერენიტეტისა და ტერიოტრიული მთლიანობისადმი.
"პრეზიდენტებმა ასევე ისაუბრეს საქართველოში მიმდინარე რეფორმებზე და მომავალი ადგილობრივი არჩევნების მნიშვნელობაზე. პრეზიდენტმა სააკაშვილმა მადლობა გადაუხადა პრეზიდენტ ობამას ამერიკის წვლილისთვის საქართველოში ქმედითი ლიბერალური დემოკრატიის მშენებლობის საქმეში.
ორივე პრეზიდენტმა კიდევ ერთხელ დაადასტურა, რომ სტაბილური და დემოკრატიული საქართველო გასაღებია რეგიონალური მშვიდობის, თანამშრომლობისა და წინსვლისათვის", - აღნიშნულია განცხადებაში.
სააკაშვილსა და ობამას შორის სატელეფონო საუბარი წუხელ, 20:00 საათისთვის გაიმართა.